URamaphosa ukhuze eyokuzimela kweSACP
AWUZANGE ube khona umbango kumaKhomanisi engqungqutheleni yokukhethwa kobuholi kwazise uNobhala-jikelele uDkt Blade Nzimande, uSihlalo uMnuz Senzeni Zokwana, uMgcinimafa uNkk Joyce Moloi-Moropa, iPhini likaSihlalo nguMnuz Thulas Nxesi, bonke babuyele ezikhundleni zabo.
Esikhundleni sikaMnuz Jeremy Cronin kukhethwe uMnuz Solly Mapaila oyiPhini lokuqala likanobhala-jikelele, uMnuz Crist Matlala uyiPhini lesibili kanobhala jikelele.
Iphini likaMengameli we-ANC uMnuz Cyril Ramaphosa lemukelwe ngengoma ethi Ntate Ramaphosa thibela maGupta okusho ukuthi Bab’ uRamaphosa vimba amaGupta, kule ngqungquthela ye-SACP eBoksburg izolo.
URamaphosa uthe umbimbi kumele luqine ngoba kunedlanzana eliphethe umbuso.
“Kufanele sibambane ngezandla siwumbimbi kungabikhona abangena okhethweni bexebukile. Kumele sikhulume uma kukhona esingahambisani nakho.
“Ngeke ngithule uma umbuso usetshenziswa yidlanzana. Ngizokhuza ngoba angifuni izwe lihambe ngingenzanga lutho,” kusho uRamaphosa.
Uxwayise i-SACP ngokuthi ingenele ukhetho ngokuzimela wathi lokhu akufanele kwenzeke yize kungahambi kahle ombimbini.
“Akufanele sihlukane noma ngabe kwenzekani, kumele sibumbane sibe munye ukuze siqhubeke nokusebenzela abantu bakithi.
“Ngiyazi ukuthi kukhona kinina abathi sekufanele i-SACP izimele. Yebo kuzwakala kahle kodwa iqiniso wukuthi akumele sithathe izinqumo ngoba sidiniwe noma sidinwa ngamaGupta nokunye okungasiphethe kahle.
“Kumele sizibuze ukuthi kunqoba abantu abanjani, ababumbene noma abayinhlakanhlaka?” kubuza uRamaphosa.
Uthe ingqungquthela yangesonto eledlule ebiseGoli igqugquzele ukuthi i-ANC izinuke amakhwapha, igxile ekuzivuseleleni.