Babalise ngokuningi kufike uKaunda
KUGQAME izikhalo zobugebengu obudlangile, ukuqhuma kwezitamkoko nokuvuza kwamapayipi amanzi, ngesikhathi uNgqongqoshe woMnyango wezokuThutha, ukuPhepha nokuXhumaniswa koMphakathi uMnuz Mxolisi Kaunda evakashele ku-ward 76 eMlaza njengengxenye yemikhankaso kahulumeni eyaziwa nge-Operation Sukuma Sakhe, izolo.
Njengoba uhulumeni wesifundazwe ubunemihlangano nemiphakathi kuma-ward ehlukene eMlaza ukuzwa izikhalo zabantu, umphakathi ukhale ngokuqhuma kwezitakomkoko nezinga lokubanjwa kwenkunzi kule ndawo.
UNksz Hazel Mlaba waseMalandeni, uthe iningi labantu abahlala kule ndawo sebehaqwe yisifo sofuba ngenxa yokuqhuma kwezitamkoko umasipala ongazilungisi.
“Asikwazi ukuhamba ngenkululeko, sesihlale ngaphansi kwalesi simo isikhathi eside. Kunamathoyilethi esawakhelwa ngumasipala acekelwa phansi ngumphakathi.
“Nawo asevele aphenduka izindawo zokuhlala izigebengu ezisibamba inkunzi uma siya emsebenzini,” kusho uNksz Mlaba.
Ngaphambi kokuba nomhlangano namalungu omphakathi wakule ward obusehholo lasehostela iGlebbelands, uKaunda uqale waba nomzungezo ehamba ekhuluma namalungu omphakathi ebheka nesimo sokusebenza kwamakhamera afakwe kuleli hostela.
“Siqhuba lo mkhankaso wokuvakashela umphakathi njengohulumeni wesifundazwe ukwenza isiqiniseko sokuthi sisondeza uhulumeni kubantu. Singasho ukuthi uhulumeni nezinhlaka zokuvikela zenza umsebenzi oncomekayo ukuletha uzinzo kuleli hostela.
“Nakuba singeke sizishaye isifuba sithi sikwenze konke njengoba kukhona abantu abasakhala ngezinto ezithile njengokuvuza kwamanzi, kodwa siyethemba ukuthi umasipala usebenza ngokuzikhandla ukulungisa isimo,” kusho uKaunda.
Uveze ukuthi amakhamera afakwe kuleli hostela enza umsebenzi omkhulu ukulekelela amaphoyisa, wabalula ukuboshwa kwabalumbaniswa nezehlakalo zokubulala zakamuva njengobufakazi bomsebenzi obalulekile wokufakwa kwawo .
“Kwezinye izigameko ezenzeke kuleli hostela, amaphoyisa ayaqhubeka nokuzama ukuqoqa ubufakazi. Ngeke siwaphushe sithi awabophe ngaphandle kobufakazi, kodwa siyawagqugquzela ukuthi awasheshise uphenyo. Sinxusa nomphakathi ukuthi usebenzisane namaphoyisa,” kusho uKaunda.