Usekhosele komakhelwane odlelwe umuzi ‘wuhlanya’
ISIFIHLA ikhanda komakhelwane indoda ethi idlelwe umuzi ‘wuhlanya’ olugweve nawo ngemuva kokuthi lucelelwe owayeyikhansela indawo yokuhlala nyakenye.
UMnuz Cija Wanda (58) wakwa-B, eMlaza, usephenduke inyamazane ebalekela uMnuz Lwazi Duma (28) amsola ngokugula ngengqondo athe usemqedile ngenduku, umxosha nasemzini wakhe yize ayemhlalise ngesihle.
UWanda okhulume neSolezwe esesibhedlela ePrince Mshiyeni Memorial ngoLwesibili, ubelimele kabi ebusweni iso langokwesobunxele livalekile.
“Ngimhlalise kwami ngoba exoshwe kubo. Ucelelwe owayeyikhansela uNkk Thandi Langa ngoba exoshwe kubo engenandawo yokuhlala.
“Ubengabonisi zimpawu zokugula ngengqondo ngesikhathi ngimemukela kodwa ngokuhamba kwesikhathi ngabona ukuthi ngizalelwe yinja endlini,” kusho uWanda.
Uthe indaba iqale lapho uDuma eshisa zonke izimpahla zakhe ayefike nazo wase ephoqa uWanda ukuthi amnike ezakhe.
“Ubezigqoka ngenkani engafuni ukuziwasha. Uthe esuka washisa ezami, engasagcini ngokushisa ezakhe izingubo. Ubeseshisa yonke into ngisho nempahla yasendlini,” kuchaza uWanda.
Isolezwe livakashele owayeyikhansela uNkk Langa ukuzwa ngokwaholela ekuceleleni uDuma indawo yokuhlala.
“Ufike kimi ezongikhalela engenandawo yokuhlala ngoba exoshiwe kubo. Udaba lwakhe beludabukisa, ngizamile ukumkhulumela nabakubo kodwa kwanhlanga zimuka nomoya. Baveze ukuthi abamfuni ngoba ungumuntu oshaya odadewabo, unodlame. Isizathu sokuthi ngimcelele indawo yokuhlala yingoba bengazi ukuthi uWanda uhlala yedwa,” kuchaza uNkk Langa.
Uvumile ukuthi wenza iphutha ngokumcelela ngoba naye usezamile ukumtshela ukuthi athole enye indawo yokuhlala, kodwa akezwa. Uveze ukuthi uke wamzama ngokuthi amsize esitolo ukuze athole ukuze akwazi ukuziphilisa kodwa wasebenza inyanga eyodwa wayeka.
UDuma obehamba ekhuluma yedwa ngesikhathi esondela emotweni yezintatheli, ukuqinisekisile ukuthi umshayile uWanda.
“Bengiziphindiselela. Ngashawa yizingane zakhe. Uma kumele ngiboshwe anginandaba. Nguyena owangincenga ukuthi ngihlale naye. Okunye engimshayele khona ukuthi ungene endlini wangibangela umsindo ngimtshela ukuthi ngifuna ukulala,” kuchaza uDuma.
Okhulumela amaphoyisa KwaZulu Natal uColonel Thembeka Mbhele uthe likhona icala lokushaya elivuliwe esiteshini samaphoyisa eMlaza.