Ulaka lweSilo kwethulwa isikhungo esizosiza isizwe
ISILO Samabandla sikuhlabe sakuhlikiza ukugcinwa kwezingane ezikhulelwe ezikoleni zabamnyama. UHlanga Lomhlabathi belukhuluma ngesikhathi kwethulwa isikhungo iDr Themba Fakazi Multi-Purpose Centre eyakhiwe KwaMbonambi izolo.
“Ngeke uyithole ezikoleni zabelungu, ezamaSulumane, nezamaNdiya ingane ekhulelwe. Lowo kusuke sekuwumfazi. Iya ezikoleni zabamnyama, uzowubona umhlola,” kusho iSilo Samabandla. Sinxuse amadoda sathi mawasukume abuyise isithunzi sezwe ngoba izingane sezinikezwe amalungelo angaphezu kwawabazali.
“Uma ujezisa ingane ivele iphakamise inombolo yamaphoyisa. Izingane azibuyiselwe kuNkulunkulu.”
UNgangezwe uthe uSathane uhlasele intsha kakhulu.
“Intsha iningi ukwedlula thina. Yandiswa nayilezi zigaba ezibizwa ngentandoyeningi.” ISilo sitshele umphakathi ukuthi uhulumeni uthi izingane zabamnyama azimithe ukuze zithole isibonelelo. “Uma zifuna ukusihushula isisu ziyakwenza ngoba zinelungelo.Thina sasishaywa, siba nezibazi ezazikhomba ukuthi sikhuliswe ekhaya elinomthetho,” kusho iSilo.
Simtuse kakhulu umsunguli wesikhungo uDkt Themba Fakazi sathi sikholwa wukuthi sizosusa intsha ezidakamizweni nasemikhubeni engasile siyihlomise ngolwazi. Sinxuse umphakathi ukuba usiphathise okwezikhali zamaNtungwa ukuze singagcini sesiphenduke umhhume wabaphangi. INgonyama igxile kakhulu ekutheni abantu ababuyele kuMdali yeseka inkulumo yayo ngamavesi ebiwacaphuna eBhayibhelini. Ephawula uDkt Fakazi uthe usungule isikhungo ngemali yakhe efuna ukufukula umphakathi, intsha nosomabhizinisi bendawo. Ubonge kakhulu iSilo ngokuba semcimbini. Ukhwele wadilika emadodeni ahlala dekle ngoba efuna ukusizwa uhulumeni. “Kuyihlazo ukubona indoda itoyitoyela ithoyilethi. Ize ishise izakhiwo ifuna ithoyilethi,” kusho uDkt Fakazi.
Okuqanjwe ngaye elinye ihholo iMrs Siphiwe Ngubane uthe simshaqisile isenzo sikaDkt Fakazi ngoba wayengazi ukuthi usezochonywa uphaphe legwalagwala ngayekwenza. UDkt Fakazi uthe wenza lokhu kuNkk Ngubane ngenxa yemisebenzi ayenzela ogogo baseNhlanzeni. Kunandise umculi ocula owokholo uVelenkosini Ntuli nomama bendawo. ISilo besihambisana noNdlunkulu waso uKaMafu nabaNtwana baseNdlunkulu.