Ushonele esibhedlela olimale engozini yemoto
SEKUMENELE umfana obekubanjwe umoya ukuthi asinde esibhedlela, obesengozini ebhubhise umndeni eMhlanga ngoMgqibelo.
U-Akwande Ntuli (18), obekunguye yedwa osele esibhedlela engozini eyenzeka emgwaqweni u-R102 ngaseMhlanga, ushone izolo esibhedlela. Ubelokhu esegunjini labagula kakhulu kusukela wangeniswa esibhedlela ngoMgqibelo ebusuku. U-Akwande kuthiwa ubefunda uGrade 12 eZiphembeleni High, eMatendeni, eNanda. Isibalo sabashone kule ngozi sigcine sesifinyelele kwabayisikhombisa. Umndeni wakwaNtuli yiwo oshonelwe kakhulu njengoba sebebane abadlulile.
UNksz Philisiwe Ntuli (30) okhulumela umndeni, uthe umfowabo omncane ushone izolo ekuseni esibhedlela. UNksz Ntuli ongasenaye uyise, usesele nomunye umfowabo omncane obengekho engozini. Ushonelwe ngunina uNkk Noxolo Ntuli (49), udadewabo uLungile (28) nobabekazi uMathoza (42). Kushone noNksz Thabile Ndebele (42) waseNtuzuma G, obeshayela imoto iSuzuki obengumngani kaNkk Ntuli abebesonta ndawonye.
UNksz Ntuli uthe bahlele ukungcwaba ndawonye wonke umndeni noNksz Ndebele ngoba bebesonta ndawonye.
“Sihlele ukuzingcwabela siwuhlanganise umngcwabo wabo bonke ngempelasonto. Bazongcwatshwa ngoMgqibelo, inkonzo izohlanganiswa ehholo lomphakathi eNtuzuma. Usisi Thabile ubengumngani omkhulu kamama futhi sisonta naye koFakazi bakaJehova,” kusho uNksz Ntuli.
UMnuz Mluleki Mntungwa okhulumela uMnyango wezokuThutha nokuPhepha koMphakathi esifundazweni uthe umndeni wakwaNtuli bawulekelele ukuxhumana nabeRoad Accident Fund.
“Inselelo yethu kube ukuthi omunye umndeni asikwazanga ukuxhumana nawo ukuze kuhlanganiswe umngcwabo noma inkonzo yesikhumbuzo,” kusho uMntungwa.