Bacijwe ngezifundo ezahlukene othisha
BADELE amaholidi babuthana enyuvesi yaKwaZulu-Natal ophikweni lwaseWestville eThekwini othisha bezikole ezingenzanga kahle kwa-matric ngonyaka odlule bezocijwa ngokusebenzisa ubuchwepheshe uma befundisa.
Labo thisha abaqhamuka ezikoleni ezehlukene ezifundeni ezingu-12 zakulesi sifundazwe, bacijcwa ngezifundo ezehlukene okubalwa iMaths, Maths Literacy, Geography, Accounting, Business Studies nezinye izifundo.
UMnuz Mbongiseni Mazibuko, obhekele uhlelo lokufunda nokufundisa eMnyangweni wezeMfundo esifundazweni, uthe inhloso yokuhlanganisa othisha bezikole ezingenzanga kahle ukubacija ngezobuchwephese ukuze babusebenzise uma sebefundisa.
Uthe bekungokokuqala kuba nengqungquthela efuze le kulesi sifundazwe ethinta ukusebenzisa ubuchwepheshe uma ufundisa.
“Sithathe kakhulu abafundisa ezikoleni zamabanga aphezulu ikakhulu u-matric kodwa inhloso wukuthi wonke uthisha kudingeka akwazi ukufundisa esebenzisa ubuchwepheshe.
“Lokhu kuzosiza yena uthisha njengoba sisabalalisa ama-laptop ezikoleni,” kusho uMazibuko.
UMazibuko uthe baqale uhlelo abalwenza ezikoleni ezingu-60 kulesi sifundazwe lapho behambise khona ama-tablet nama-laptop kulezi zikole.
“Sisebenzisana nenkampani iNdabase Printing, esisabalalisela izincwadi ezikoleni esenza nayo uhlelo lokusabalalisa ubuchwepheshe ezikoleni.
“Sihambisa ama-tablet anazo zonke izifundo uthisha afundisa ngazo.
“Lolu hlelo ludle u-R60million kanti sihlela ukuthi senabele nakwezinye izikole esifundazweni,” kusho uMazibuko.
Isikhulu seNdabase, uMnuz Thanda Nyide, sithe ama-tablet nama-laptop ahanjiswa ezikoleni ngeke kube lula ukuthi ebiwe ngoba bawafaka esisefeni esingasukumi phansi.
UNyide uthe bahambisa namabhodi amhlophe, uhlelo lokuthi uthisha akwazi ukufundisa amakilasi amabili ehlukene ngesikhathi esisodwa esebenzisa ubuchwepheshe.
“Siqale ezikoleni zasemakhaya kanti ngeke ukwazi ukuweba lama-tablet njengoba kuhlale kubikwa kwezinye izifundazwe ukuthi ayantshontshwa. Siwafaka esisefeni esingasuki phansi futhi esingagqekezeki.”
UDkt Ngogi Mahaye, obhekele izinhlelo zokuphucula imiphumela ehhovisi likaNgqongqoshe wezeMfundo, uthe le ngqungquthela izosiza kakhulu njengoba ubuchwepheshe bubalulekile kwezemfundo.
“Noma kunjalo kodwa uthisha ngeke aphelelwe umsebenzi ngenxa yobuchwepheshe uyadingeka ngoba nguyena ongumgogodla wemfundo. Siyabacija ukuthi bakwazi ukusebenzisa ubuchwepheshe ikakhulu ukuphucula imiphumela yabafundi,” kusho uMahaye.