Umculi unikele ngo-R50m esibhedlela
UNIKELE ngo-R50million esibhedlela sezingane saseThekwini umculi waphesheya uSir Elton John.
IKwaZulu-Natal Children’s Hospital iseduze kwe-Addington, eSouth Beach. Kanti lo mculi wase-England owahlonishwa yiNdlovukazi yamaNgisi njengoba esebizwa ngoSir, unikele ngemali eyenziwe emcimbini wakhe obizwa nge-Elton John Aids Foundation Dinner obuseLondon.
Isikhulu esiphezulu seKwaZulu-Natal Children’s Hospital, uDkt Arthi Ramkissoon, sithe bayajabula ukuthola lo mnikelo ngoba uzobasiza ukuvuselela isibhedlela sezingane okungumsebenzi abawuqale eminyakeni emine edlule.
Uthe bazokwazi ukuthola odokotela abagxile ezinkingeni zentsha bathenge nezinye izinsiza zokusebenza esibhedlela.
“Umnikelo ka-Elton John siwuthole emuva kokumcela ukuthi asivakashele ngesikhathi ehambele i-International Aids Conference ngo-2016. Sasingalindele ukuthi uzovuma ukusivakashela kodwa wahamba nathi wayolalela izingane ezilashwa esibhedlela wase evuma ukusinikelela.
“Bakwaze ukuqoqa u-R50million emcimbini wakhe i-Elton John Fundraising Dinner obuseLondon ngoJuni 2,” kusho uDkt Ramkissoon.
Uthe ngaphezu komnikelo ka-Elton John bathole u-R70million eMnyangweni wezeMpilo KwaZulu-Natal ukuze bavuselele ingqalasizinda yesibhedlela. Kanti lo mnyango uzibophezele ukuthi uzobhekelela izindleko zokusebenza kwesibhedlela okubalwa ezabasebenzi, imithi nama-laboratory uma isibhedlela sesisebenza.
Isibhedlela sezingane sasibizwa nge-Addington Childrens Hospital, sasilapha zonke izingane kusukela ngo-1931. Savalwa ngesikhathi sobandlululo ngama-1980s sagcina sesibhidlika ngoba singasanakiwe.
Umsebenzi wokusivuselela uqale ngoJulayi 2013 njengoba sizoba negumbi lokunakekela intsha ephila ne-HIV.
NgoJuni 24 kulo nyaka i-Elton John Foundation ibhale ekhasini layo likaFacebook ithi ibonga abaxhasi bayo abanikele ngo3million Pounds.
“Imali izosiza abantu abaphila neHIV emhlabeni jikelele ikakhulukazi intsha ezovulelwa igumbi elizoba nemishanguzo yayo eKwaZulu-Natal Childrens Hospital, eThekwini, eNingizimu Afrika,” kusho abe-Elton John Foundation.
U-Elton John uqale ukusiza abaphila ne-HIV ngo-1993 waze wasungula nenhlangano yakhe ukuze abanalesi sifo bathole imishanguzo, balulekwe emoyeni, bathole ukudla nezinye izinsiza ezizokwenza impilo yabo ibe mnandi.