Owezemfundo ulinde izicelo
UNGQONGQOSHE weMfundo eyisiSekelo uNkk Angie Motshekga uveze ukuthi izifundazwe eziyisithupha kuleli aziyicelanga imali ethe xaxa ukuze zibhekelele abafundi abathuthwa ngamabhasi.
UNkk Motshekga uthe iKwaZulu-Natal, Eastern Cape, Limpopo, Mpumalanga neNorth West bekufanele bacele u-R639 million ukuze bakwazi ukuthutha abafundi abahlala kude uma beya ezikoleni.
UNkk Motshekga ubephendula imibuzo ye-DA ePhalamende. Uthe okwamanje lezi zifundazwe azikakayiceli imali yokuthutha abafundi yize kwaziwa ukuthi ziyashodelwa.
“Siyaxoxa nalezi zifundazwe ukuthi zilethe izicelo zemali ngoba besingakazitholi,” kusho uNkk Motshekga.
NgoMeyi kuvele ukuthi emnyangweni wezemfundo bangu-556 294 abafundi abadinga amabhasi uma beya ezikoleni kanti bangu-459 5989 abaxhasiwe kulo nyaka. IGauteng iyona enesibalo esikhulu sabafundi abagibela amabhasi uma beya ezikoleni kwazise bangu-109 618 kulandele i-Eastern Cape ngabawu-78 061, Mpumalanga ngabawu-60 119 kugcine i-Western Cape ngabawu-58 217.
Kwezinye izifundazwe baphakathi kuka-11 929 no-47 747 abafundi abahamba ngamabhasi uma beya ezikoleni. UNkk Motshekga uthe bangu-465 977 abafundi abebethuthwa ngamabhasi ngo-Ephreli nonyaka.
Uthe bafaka u-R2.3 billion ukuqinisekisa ukuthi abafundi bafika emakhaya bephephile.
Imali yokuthutha abafundi ayibekiwe eceleni kodwa kuyaye kuthathwe kwesuke ikhona emnyangweni nasezifundazweni ezihlukahlukene, lokhu kuphoqe inhlangano elwela abafundi i-Equal Education ukuthi iqale uhlelo lokuthi imali yokuthutha abafundi ibekwe eceleni.
UNkk Motshekga uthe izingane ezithuthwayo e-Eastern Cape naseNorthern Cape balindele ukuthi zehle kulo nyaka ngenxa yokuthi kukhona izikole ezivaliwe kanti ezinye izingane sezifunda ezikoleni eziseduze namakubo.
KwaZulu-Natal uthe isibalo sezingane ezidinga ukuthuthwa ngamabhasi uma ziya esikoleni siyanda ngenxa yokuvalwa kwezikole nokukhula kwemijondolo ekude nezikole.
“Izingane esizoqinisekisa ukuthi zithola amabhasi okuya esikoleni ezihamba amabanga amade futhi ezingenazo izinto zokuthutha eduze nazo,” kusho uNkk Motshekga.
Okhulumela uNgqongqoshe wezeMfundo KwaZuku-Natal, uMnuz Kwazi Mthethwa, uthe ukuthuthwa kwabafundi bekungaphansi komnyango wezokuthutha esifundazwe kodwa sekubuyele emnyangweni wabo.
Uthe ikhabhinethi yesifundazwe isanda kugunyaza lokhu wathi azikho izinkinga ezithinta uhlelo lokuthuthwa kwabafundi kulesi sifundazwe.
“Sesithenge ngisho izikebhe ukuze sithuthe abafundi abawela imifula ukukhombisa ukuthi sibakhathalele abafundi abangenazo izinto zokuhamba.
“Kwamanje luyaqhubeka uhlelo lokuthuthwa kwabo ngamabhasi,” kusho uMthethwa.