UMotshekga ugxeke abadudula abafundi
UNGQONGQOSHE weMfundo eyisiSekelo uNkk Angie Motshekga uthi abafundi abaphumelela kwa-matric abasuke bephase zisuka emazingeni aphansi.
UNkk Motshekga uthe kunothisha basemazingeni aphansi abadudula abafundi babayise kwamanye amabanga yize bengenzanga kahle.
“Babadudulela kwamanye amakilasi kuthiwe bayobona abanye othisha abalandelayo.
“Akumele kwenzeke lokhu ngoba abafundi badluliswa baze bafike kwa-matric bese bebhajwa bengasakwazi ukudlulela phambili,” kusho uNkk Motshekga.
Ubekhuluma ngesikhathi kunomhlangano wokubheka izikole ezenza kahle ePitoli.
UNkk Motshekga uthe okubuhlungu wukuthi abafundi bajajwa ngemiphumela ka-matric.
“Imiphumela ka-matric yiyona ejaja ukuthi umfundi ubefundani iminyaka engu-12.
“Uma engasenzi kahle yilapho kucaca khona ukuthi usuke eduduliwe zisuka amadaka yingakho kubalulekile ukuthi othisha bakwaGrade R nakwaGrade 1 baqinise kakhulu ekufundiseni. Uma umfundi engenzi kahle akungathiwa usazokwenza kangcono emabangeni alandelayo bese edluliswa,” kugcizelela uNkk Motshekga.
Uthe kudingeka umfundi aphase kahle zisuka ukuze akwazi ukuphumelela u-matric.
Uthe noma sekuhlelelwa u-matric kuqiniswa kakhulu kwaGrade 10, 11 no-12 hhayi kwaGrade R.
Izinyunyana zothisha zihlale zikhala ngokuthi umnyango ugxila kakhulu emazingeni aphezulu ikakhulu u-matric ekubeni ngabe ugxila emazingeni aphansi.
Zihlale zigcizelela ukuthi abaqashwe ngokugcwele abafundisa uGrade R njengoba bengenayo ngisho imihlomulo efana nama-medical aids, amalivu nokuthi abaholi imali efana nabanye othisha.