AmaCancer ayashesha ukuzwela
UBUDLELWANE BECANCER UPHAWU lwesine kwezingu-12 ezikhona kwiZodiac (lapho kuhlala khona izilwane) olubizwa ngokuthi iCancer, olwabantu abazalwa kusukela 22 Juni – 22 Julayi, luphinde lube uphawu lokuqala lwamanzi olubonakala ngenkalankala. Namuhla sizobheka iCancer ebudlelwaneni siqonde ukuthi bangabantu abanjani, bathandani nokuthi ungabaphatha ngayiphi indlela ukuze ubambisane nabo ukuze kwande injabulo kusimame nokuxhumana.
Zonke izimpawu ezikhona zinokuthize ezidume ngakho, lokho esingathi zimandla ngakho nendlela yokwenza izinto engefaniswe nolunye uphawu, abantu abangamaCancer bayakwazi ukunakekela kokunye baze bazikhohlwe ukuthi nabo bangabantu abadinga ukunakwa.
Kuyinto engeke yafihleka ukuthi amaCancer anemizwa ebukhali, bayashesha ukuzwela futhi ukuzwela kwabo kubenza bakwazi ukuzinikela othandweni nasebudlelwaneni ngokupha nokwabelana ngothando olusuka ekujuleni kwenhliziyo. Kubalulekile ukuthi umuntu oyiCancer aqaphelisise angazifaki ezikhinsini nesezinkingeni eziza nothando bukhoma ngokulawulwa imizwa yangaleyo nkathi.
MaCancer amahle ningadlali ngothando lwenu ngokulinika umuntu ongenandaba nomunye umuntu ozazi yena kuphela ongenanhlonipho yemizwa nongazikhathazi ngenhliziyo yomunye. Akulula ukuqambela amanga iCancer ngoba linekhono lokwazi ukumuzwa osenga ezimithiyo engakaluqedi udaba. Imizwa yabo ibenza bakwazi ukushesha basole okunuka santungwana. Abadingi ukuthi baze bakubambe oqotsheni ngoba banemibono enamandla evama ukushaya emhlolweni uma bezifundisa ukusebenzisa umbono umqondo nemizwa, kungashayisani kodwa kusebenzisane.
AmaCancer ayisizwe esinothando lweqiniso kodwa kubalulekile ukuthi bakwazi ukubacabangela abathandiweyo babo ngokuthi baqaphelisise indlela abasebenzisa ngayo amagama, bangakhulumi budedengu ngokulalela imizwa yesikhashana. Umuntu oyiCancer angahlomula ngokuthi angazithatheli phezulu izimo nezehlo, azifundise ukuthi kunesikhathi sokukhuluma, sokuthula nesokulinda futhi awulahlekelwa yilutho ngokwenzenjalo ngoba imizwa nemidlinzo iyabakha noma ibubhidlize ubudlelwano.
AmaCancer avama ukuba madolonzima ekuqedeni nasekuphumeni kubudlelwano obungabasimamisi, ngisho lobo budlelwano bucekela phansi isithunzi somunye umuntu.
Cancer, zisize udlulele phambili, ungaziniki ithemba elingekho lokuthi izinto zizolunga uma uyisisisulu noma ungubhongoza ebudlelwaneni, lapho ukujabula, ukunakekelwa, ukuhlonishwa nothando kungasabonwa noma kungakaze kube khona – shiya, udlulele phambili, uhambe ungaqalazi emuva.
IMIKHAKHA YEMISEBENZI
AmaCancer angabantu abazalwa nokubekezela nempokophelo eyisimanga, ingakho bekwazi ukuqala amaphupho amancane bawahlahlamelise bawakhulise aphethe ngokuba izinto ezinkulu, lapha singabala umsebenzi noma inkampani eqala incane igcine yondla isizwe.
Umuntu oyiCancer ucabanga ngendlela encike kakhulu ekutheni umizwa nemimbono anayo ngaleso sikhathi imtshela ukuthini kanti banomqondo osheshayo ukubona izinto. Njengoba inkalankala inezindlawu zokubamba zibambelele nabantu abazalwa ngalesi sikhathi sonyaka banendlela efanayo nalesi silwanyana esihamba lukeke, bayakwazi ukubambelela babekezelele izimo ezibucayi zomsebenzi nabakwenzayo. Amandla eCancer ancike kakhulu ekuqondeni izimo zabantu abaningi, bayayithokozela imikhakha ebenza bakwazi ukwabelana ngothando abanalo bavikele labo ababuthaka kanti banekhono lokuqaphelisisa.
Kubalulekile ukuthi amaCancer agweme isilingo sokuba ngugombela kwesakhe ngoba lokho kwakha isihlava esibi, nolaka oluseduse alubakhi ubungane obuhle kubantu kanti ukushesha ukwahlulela singakaqondakali isimo kunguzigwaza ngowakho ikakhulu emsebenzini.
Umuntu oyiCancer uyakwazi ukumbona kusukela ebuncaneni bakhe, nasesikoleni angaphazamiseka lapho ebona omunye umfundi ebhekene nobunzima obuthile, lulu hlobo lwabantu lungayeka elikwenzayo ngenhloso yokulekelela osenkingeni kunaye lizame ukumenza afane nabanye abafundi. Imisebenzi ebanika ithuba lokuhlenga omunye umuntu osenkingeni njengokufundisa ezikolweni ikakhulukazi emabangeni aphansi, osonhlalakahle, ubuhlengikazi ukubelethisa neminye imikhakha enokusebenzisana nezibhedlela incike kakhulu kwiCancer ngoba ukunakekela kuyimvelo kubo.
AmaCancer azalwa nobuvaka obuthize empilweni lokho kubenza bakwazi ukusebenza ngokuzikhandla, uvalo oluvama ukubavakashela kalulubi ngaleyo ndlela empeleni lubenza bakwazi ukwenza kangcono okudlula ezinye izimpawu ngoba bayakwesaba ukubonakala sengathi beyehluleka ukwenza umsebenzi.
ICancer liyakwazi ukuchuma ekudayisweni kwezindlu, naleyo misebenzi ephathelene nokupheka ukubhaka, ukudla neziphuzo ibanikeza umuzwa wokwenelisa emoyeni.
Sengathi bangaqaphela ukuthi bangazimuki ngoba imizimba yabo isengcupheni yokukhuluphala. OKWENZEKA EMAFINI Mhla ka-22 Julayi selithambeme, sizobona ilanga liphuma ophawini lweCancer lingena kwiLeo bese kuthi emini ngoJulayi 23 inyanga izohlangana nelanga ngaphansi kwalolu phawu lwengonyama esimeni senyanga entsha (new moon).
Ezintathakusa ngoJulayi 26, iplanethi engamele konke okokuxhumana izongena ophawini lweVirgo okuyinto enhle esibhakabhakeni ngoba kuvuna konke okuthinta okuphila phansi komthunzi welanga.