UMkhwebane uwenze wanzima umsebenzi wakhe
KUKHONA ababeshaya amakhala ngesikhathi kuqokwa u-Advocate Busisiwe Mkhwebane njengoMvikelil woMphakathi ozongena esikhaleni sika-Adv Thuli Madonsela.
Laba ababekhala babethi abamethembi ukuthi uzowenza ngendlela lo msebenzi.
Abanye bethu bathi akanikwe ithuba kubonakale ukuthi uzowenza kanjani umsebenzi, ahlulelwe ngento ayenzile hhayi ngamahemuhemu.
Selokhu ewuqalile-ke umsebenzi wakhe u-Adv Mkhwebane kuncane asakwenzile okukhombisa ukuthi umfanele lo msebenzi njengoba kubonakala sengathi akayazi kahle into ayenzayo kanti okudumaza kakhulu ukuthi kwamthetho wezwe akawazi njengoba engummeli nje futhi kufanele asebenzise wona ukuvikela umphakathi.
Siyabonga ukuthi ugcine ewuyekile lo msangano abethi uzowenza wokuphikelela nomyalelo awunike iPhalamende wokuthi alishintshe uMthethosisekelo ngesikhathi ekhipha umbiko ngophenyo oluthinta imali engu-R1.125 billion eyabolekwa i-Bankcorp yiBhange loMbuso ngesikhathi kusaphethe uhulumeni wobandlululo. Leli bhange lagcina lithengwe ngu-Absa.
Uthe le mali kumele ikhokhwe ngu-Absa. Ubethi kumele kushintshwe uMthethosisekelo ngoba ubefuna kuguqulwe umsebenzi iBhange loMbuso elasungulelwa wona.
Indlela abephendula ngayo kusukela ekhiphe lo mbiko uma ongoti bezama ukumbonisa ukuthi isinqumo sakhe asikho emthethweni ibimangaza futhi iphendule izwe inhlekisa.
Kwale ngisho iBhange loMbuso, Absa noNgqongqoshe wezeziMali nePhalamende sebesabisa ngokuya enkantolo beyophikisa umbiko wakhe, uqale washaya phansi ngonyawo esho ngeqholo ukuthi bohlangana enkantolo ngaphambi kokuthi abuye amemezele ukuthi ngeke esakwenza lokhu.
Kunomkhuba omubi owandayo ePhalamende, ezinkampanini zikahulumeni nasezinhlakeni ezaziwa ngama-Chapter Nine ezifana nehhovisi lika-Adv Mkhwebane wokugijimela enkantolo ukuyozivikela ngisho kubonakala ukuthi mancane amathuba okuliwina icala.
Umsebenzi ka-Adv Mkhwebane ubuvele unzima kodwa usewenze walikhuni kakhulu ngezenzo zakhe futhi kuzoba likhuni ukumethemba.
Kodwa-ke uzenzile akakhalelwa.