Ukhuthaza abesimame ngezamabhanoyi
UBONGA imisebenzi yabazali emkhuthaze ukuthi angayexwayi imiqingo yezincwadi, owesifazane osemkhakheni wokuthuthukiswa kwezindawo eziseduze kwezikhumulo zezindiza, ophinde afundise e-University of KwaZuluNatal (UKZN).
UNksz Nomkhosi Luthuli (27), usophikweni lweBusiness and Leadership e-UKZN lapho efundiswa khona iDevelopment Economics nePractitioners Research. Ugxile ekucwaningweni ngokuthuthukiswa komnotho kwezamabhanoyi kanti wenza nePHD kuwona lo mkhakha.
Umkhakha akuwona ubheka ukuthi amadolobha aseduze kwezikhumulo ayawandisa yini amathuba okufukula umnotho.
UNksz Luthuli ozalwa ngubaba ongumfundisi nomama onguthisha, ukhule ephoqeleka ukufunda incwadi noma yiBhayibeli, yingakho engakunqeni ukufunda.
“Ngakhula ngishintsha izindawo zokuhlala ngenxa yokuthi ubaba ungumfundisi. Ngaqeda iDegree yeCommunity and Development Studies e-UKZN ngayosebenzela kwenye inhlangano ezimele. Ngafike ngangathokoza ngabona sengathi bangithatha kancane ngenxa yokuthi ngine-degree kuphela. Lokhu kwenza ngishiye, ngafaka isicelo sokuyofunda e-University of Cape Town.”
Ngo-2011 wathola umfundaze wokuyoqhuba izifundo zakhe, wenza iMasters of Commerce walandela ngeHonours Degree.
Ngo-2012 uthole ithuba lokuqeqeshwa emnyangweni wezokuthuthukiswa komnotho eKZN.
Echaza ngokugxila ocwaningweni lokuthuthukisa umnotho nezamabhanoyi, uthe ubefuna ukungena emkhakheni okusakhonya kuwo abesilisa. Uthe akekho obecabanga ukwenza lolu cwaningo ngoba kuthathwa ngokuthi ngolwabathize. Ucwaningo lwakhe ulwenze ngokubheka iDube Trade Port, esibe yisizinda sokuthuthukisa ezomnotho eThekwini.
“Lo mkhakha engikuwo usabuswa ngabesilisa yingakho nami ngifuna ukukhuthaza abanye abesifazane ukuthi bangesabi. Ngibe nenhlanhla yokukhethwa ethimbeni eligxile ekuthuthukisweni kwezamabhanoyi. Ukuba kuleli thimba kungisize ukuthi ngikhuthaze abafundi ukuthi baqeqeshwe kwezamabhanoyi. Lokhu kungagwema ukuthi baye phesheya ngoba befuna ukungena kulo mkhakha.”
Njengoba efundisa aphinde enze nePHD, uthe asikho isikhathi sokungcebeleka kodwa uyabekezela ngoba uyaqeda ngoSepthemba.
“Kudingeke nginciphise kweminye imisebenzi ukuze ngifunde. Isikhathi esincane engisitholayo ngesokulala kuphela.”
UNksz Luthuli wakhulela eVuma, eShowe waphothula u-matric eMlokothwa High. Uqashwe ngo-2015 ukufundisa e-UKZN. Ubeyingxenye yethimba le-Aerotropolis Institute Africa eliye eDubai naseNerthelands nyakenye, kuyofundiswa ngomkhakha wezamabhanoyi nokuthuthukiswa kwezikhumulo zawo. Nguye uthunjana kuleli thimba elisungulwe wuphiko lwase-UKZN. Uphinde abe yiNhloko yekomiti leSkills Development and Empowerment kwiKZN Black Management Forum.