‘Isifiso sami wukuba u-station commander’
WAQALA ebamba amatoho emajalidini owesifazane obe ngowokuqala ukushayela amaloli okucima umlilo kwiWest Region, kuMasipala weTheku.
UNksz Dolly Ngcobo (34), waKwaNyuswa, uyiLeading Fire Fighter ophikweni lwezokucisha umlilo nokutakula kumasipala. Phambilini amaloli amakhulu okucisha umlilo abeshayelwa ngabesilisa kodwa uNksz Ngcobo useneminyaka eyisihlanu kulo msebenzi.
“Ngaqeda isikole ngabambela umama ongasekho emajalidini, ngisebenza ezindlini. Ngabona isikhangiso ephephandabeni kuthiwa kufuneka abesifazane abazoba yizicishamlilo, ngase ngifaka isicelo. Sabizelwa enkundleni yezemidlalo ukuyokwenza inhlolokhono yokuhlola amandla ngaphasa. Sabuye sabhaliswa izivivinyo nazo ngaziphasa,” kusho uNksz Ngcobo.
Ngesikhathi eqala ukuqashwa ngo-2006 uthe ubenza umsebenzi wokucisha umlilo, wafunda wagcina eyiSenior Fire Fighter. Ubuye washayela izimoto ezincane, kwadingeka afundele kabusha ukushayela ukuze angene elolini.
“Umsebenzi wokushayela iloli awunikwa noma ngubani futhi akuyi ngamava omsebenzi nawokushayela. Kwadingeka ngiyothola izincwadi ezintsha zikaCode 11 ukuze ngikwazi ukufaka isicelo sokushayela iloli. Noma sengizitholile izincwadi ngiphinde ngenza izivivinyo zokushayela emsebenzini, ngaphasa,” kuqhuba uNksz Ngcobo.
Yize aziphasa ngaphandle kwenkinga zonke izivivinyo, uthe akubanga lula kuyena ukungena elolini. Wazama ukudojela amashifti amaningi efuna kushayele ozakwabo besilisa kodwa kwagcina kudingeka azijube. Uveze ukuthi okunye akucijelwe kulo msebenzi wukuba nesivinini njengoba behlale beya ezehlweni ezidinga ukuphuthuma.
Ufundiswe nobuchule bokuchusha kwezinye izimoto uma ephuthuma esehlakalweni. Uthe okuhle ngomsebenzi wokushayela, wukuthi akugqilazi njengokucisha umlilo.
“Njengoba ngishayela, angehli kuyo uma siyocisha umlilo. Okwami ukukhipha amapayipi amanzi ukuze ozakwethu bawasebenzise. Akudingeki ngisho ngiphume elolini. Nokho kwezinye izimo ezifana njengengozi yemoto nje kubuye kudingeke ngehle ngiyosiza ngoba yimina enginamava okutakula.”
Echaza ngomsebenzi wakhe, uNksz Ngcobo uthe udinga isibindi kodwa akusho ukuthi abesifazane kumele bawushalazele. Phezu kokuba neminyaka eminingi esebenza ezimeni ezisabekayo, zisafika izikhathi zomunyu nokwesaba.
Uthe kuyenzeka bafike endaweni lapho kushe kakhulu abantu, okuba nzima ukudlulisa leso sithombe emqondweni wakho. Kwesinye isikhathi bafika abantu bebhajwe emotweni uma kunengozi, kudingeke batakule. Konke lokho kuyahlala emqondweni kodwa uthe lukhona usizo lokwelulekwa ngokomqondo emsebenzini uma kuphoqa.
“Akukho okudlula ukuzinikela nokuba nesibindi. Kumele konke okwenzeka emsebenzini ukushiye khona, uzame ukungakufaki emqondweni uye nakho ekhaya,” kusho uNksz Ngcobo.
Uthe akaqedile ukufunda kodwa usafuna ukwenza ezinye izivivinyo agcine esengusomaqhuzu. Isifiso sakhe wukuba nguStation Commander, akhombise abanye besifazane ukuthi akukho abangeke bakwenze.