IPirates ichithe isicelo sokusayinisa uKutumela
I-ORLANDO Pirates ichithe isicelo seBaroka FC sokusayinisa uThabiso Kutumela okhuhla ibhentshi kweZimnyama.
UKutumela (24) ujoyine iPirates ekuqaleni kwesizini edlule ngemuva kokugila izimanga kwiBaroka idla umhlanganiso kwiNational First Division (NFD).
Ngesizini ka-2015/16, uKutumela ukhale wemuka nomklomelo womdlali oshaye amagoli amaningi kwiNFD. Kuthe kusenjalo wasayiniswa yiPirates. Kodwa uthwale kanzima ngesizini edlule ngoba ubelizwa ngendaba ijezi.
UMorgan Mammila, isikhulu esiphezulu kwiBaroka, utshele Isolezwe emiklomelweni yePremier Soccer League (PSL) ngoMsombuluko ukuthi bebenesifiso sokusayinisa uKutumela.
“UThabiso Kutumela besikade simfuna ukumboleka kodwa iPirates yanqaba naye futhi sikwamukelile lokho. IPirates inezinhlelo ngaye. Ngemuva kokuthola lezi zindaba yingakho sivele sasheshisa izingxoxo noLewis Macha,” kusho uMammila.
UMacha ungomunye wabadlali abebesemabhukwini eKaizer Chiefs kodwa bagcina ngokuchithwa.
UKutumela ubemiswe kabi nguTendai Ndoro noThamsanqa Gabuza bobabili abebeshintshana phambili.
UMammila uqinisekisile ukuthi uGift Motupa abamdayisele iPirates kumasizini amabili edlule usebolekiswe kwiBaroka.
“Ubolekisiwe kuze kuphele isizini. Ulambile manje futhi ufuna ukuzibonakalisa. IBaroka izomnika lelo thuba,” kusho uMammila.
IBaroka ivike izembe ngesizini edlule. Iqede endaweni ka-15 ku-log ye-Absa Premiership. Ngemuva kwalokho yadlulela kuma-Play-Off lapho ifike yadla ubhedu ibhincisela nxaye iStellenbosch FC neBlack Leopards.
“Isizini siyivale ngenothi eliphezulu. Okusibulele wukuthi asizange sidlale kahle ngomzuliswano wokuqala. Kulokhu kubalulekile ukuthi siqale kahle ukuze sizogwema ukuzithola sivika izembe ngasekupheleni kwesizini. Umqeqeshi uKgologo Thobejane siyamgcina ngoba wenze umsebenzi omuhle kakhulu. Kule sizini ezoqala sibheke ukuthi afake iqembu kuTop 8,” kusho uMammila.