OweSharks useyogijima kwelamaNgisi
UNESIFISO sokushiya iNingizimu Afrika ikhala ngaye uCobus Reinach ozobe edlala okokugcina ku-Cell C Sharks ngaphambi kokujoyina iqembu lase-England, iNorthampton ngoba ecikwa ukuzitshwa eqenjini lesizwe amaBhokobhoko. UReinach osawadlalele amahlandla ayisishiyagalolunye kuphela amaBhokobhoko, ugcine ukuba yingxenye yeqembu lesizwe ngaphambi kweNdebe yoMhlaba ka-2015 lapho esale khona ngaphandle.
NgokukaReinach, akusho lutho ukuthi umdlalo wangoMgqibelo owakhe wokugcina egqoke ijezi leSharks njengoba izobe idlala owokugcina kuVodacom Super Rugby ne-Emirates Airlines Lions eGrowth-Point King’s Park, eThekwini ngo-5.15 ntambama.
“Iqiniso ukuthi kusenesibhobo kithina uma sicabanga nomdlalo wokuvula isizini neLions eGoli lapho kwaba khona ukukhala ngenxa yezinqumo zikanondweba owayephethe umdlalo. Sibaningi esicabanga ukuthi kwakusifanele ukuwina lo mdlalo kodwake wonke umuntu uyazi kwenzekani,” kusho uReinach. ISharks ngeke isabuya izodlala eThekwini kule sizini noma ngabe iyaqhubeka kuma-quarterfinal eSuper Rugby. NgoMgqibelo uReinach obekhuluma nabezindaba ekomkhulu leqembu, eShark Tank eGrowthpoint Stadium ngoLwesibili, uzobe ebhekene noRoss Cronje okunguyena obukeka sengathi uyasondela kule ndawo ebifunwa yilo mdlali weSharks kumaBhokobhoko.
“Kuzoba wumdlalo onzima kodwa ngenhlanhla mina noRoss (Cronje) sazana kudala. Uyazi ukuthi uzoba nomsebenzi onzima wokungigada kodwa nami ngiyazi umsebenzi wami wokugada yena uzobe unzima ngendlela efanayo. Okusemqoka kimina ukuthi ngidlale ngale ndlela ezokwenza abantu bahlale bezibuza njalo ukuthi kazi yini eyadala ukuthi uReinach azidingise kumaBhokobhoko ngokusayina eqenjini laseEngland.”
Lo mdlalo weSharks neLions umqoka kakhulu ngoba iwona ozocacisa ukuthi ubani uzobhekana nobani kweyama-quarter final. Kunamahlebezi okuthi iSharks ilindele ukubona ukuthi kuzokwenzekani emdlalweni weHurricanes neCrusaders oseWellington ngawo uMgqibelo ekuseni. Kuvela ukuthi iSharks ibheke kunqobe iHurricanes ukuze iCrusaders izoqeda isendaweni yesibili bese ingayi ekuhambeni. Kodwa lokhu kuzokwenzeka uma ezikaReinach zishaywa yiLions.