I-CT City ihehwe yisipiliyoni kuModise
ASILANDELWANGA ukuyokhuhla ibhentshi kwiCape Town City isilomo somdlali uTeko Modise esisayine inkontileka yeminyaka emibili naleli qembu laseKapa.
Lezi zindaba zihlaluke ngesikhathi Isolezwe lixoxa nosihlalo weCape Town City uJohn Comitis eseLondon izolo ntambama.
Isolezwe belivele libikile ukuthi uModise uxoxa neCity futhi maningi amathuba okuthi aphelele eKapa.
“Sijabule ngokuthola umdlali oseqophelweni likaModise. Uzoletha isipiliyoni aphinde afake ugqozi kozakwabo abasha. Sithole umdlali olambile. Uhlakaniphile futhi asimlandelanga ukuthi azoqala ebhentshini. Ngezinye zezinto ezenze izingxoxo zadonsa. Kule minyaka akuyona akabhekile ukuhlala ebhentshini ngakho bekumele simtholele indawo azodlala kuyona eqenjini,” kusho uComitis.
UModise (34) uzogqoka unombolo 13. Unombolo 10 abewugqoka kwiSundowns usuthathwe ngu-Ayanda Patosi. Imenenja kaModise, uJazzman Mahlakgane ithe uModise ubesefuna ukushaywa ngumoya njengoba ekhethe ukuya eKapa.
“UTeko uhlale eGoli cishe impilo yakhe yonke. Ngakho bese kuyisikhathi sokuthi aye endaweni enokuthula. Ngeke abe nengcindezi kwiCape Town City. Sisayine iminyaka emibili ngoba umdlali uzisholo yena ukuthi ufuna ukudlala iminyaka emibili ngemuva kwalokho ayeke ukudlala ibhola. Bekungelula ukuvumelana neCity ngoba bekumele baqale bamtholele indawo eqenjini labo. Ukufika kwakhe kuzokhuthaza inqwaba yabadlali abebembuka kwithelevishini
uTeko ngesikhathi edlala kwiNdebe yoMhlaba ngo-2010 kuBafana. Indaba yaphesheya asikaze sicabange ngayo. Lafika ithuba lokuthi uTeko ayodlala phesheya kodwa ngebhadi wangahamba ngesikhathi okwakumele ahambe ngaso,” kusho uMahlakgane.
Ngesizini ezayo iCity iyodlala kwiCaf Confederation Cup. Leli qembu liqede endaweni yesithathu ku-log ye-Absa Premiership okwenze yathola ithikithi lokuyodlala kulo mqhudelwano.
UComitis uveze ukuthi uModise uzobanika isipiliyoni abasidingayo kulo mqhudelwano.
“Unqobe isicoco seCaf Champions League neseCaf Super Cup. Udlale kwiBafana imidlalo engaphezu kuka-50. Kule midlalo ubedlala ku-Africa Cup of Nations, iNdebe yoMhlaba neFifa Confederation Cup. Isipiliyoni esifana nalesi ngeke usithenge futhi uyasidinga kule miqhudelwano yase-Afrika,” kusho uComitis.