Isexwayiso kwiDundee July
KUMELE athi ukuqina amatende azogxunyekwa eDundee Horse Racing Track lapho kuzoba khona iDundee July Horse Riding Festival ngoMgqibelo.
IDundee July, eba minyaka yonke, ifaniswa neDurban July ngoba nakuyo akugcini ngomncintiswano wamahhashi kodwa kuba namatende obumnandi nezihambeli zidla ukotini.
Isangoma sezulu sakwaSouth African Weather Service, uThandiwe Gumede, sithe kunesexwayiso ngomoya onamandla ozoba khona kusasa nangeSonto. Uthe ngeke line kusukela kusasa kuze kube yingeSonto.
“Kuzoba nomoya onamandla kunojwayelekile. Isimo esinje singadala umlilo wequbula okungaba nzima ukuwucima njengoba kuzobe komile nje,” kusho uThandiwe.
Uthe ngoMgqibelo uzobe uqhamuka entshonalanga ushaya ngamandla aphakathi kuka-30 kuya ku-40 km/h.
NgeSonto nakhona uzobe uvunguza ngamandla afanayo kodwa uqhamuka ngasentshonalanga.
“Umoya uzobe ungabandi. Uzobe uqhamuka entabeni ushisa. Umoya onje siwubiza ngeBerg Winds,” kusho uThandiwe.
Uthe namhlanje amazinga okushisa azofinyelela ku-24, kusasa ku-26 kuthi ngeSonto abe ku-26 kuya ku-27. “Bangawagqoka ama-crop top,” kuncokola uThandiwe. Imicimbi yobumnandi iqala namhlanje. UVezokuhle Nala weVillage Events uthe uzobe ene-pre party ne-after party eJobes Nite Life eGlencoe namhlanje nakusasa. Kuzobe kuboshelwe uKwesta, Amanda Black, Vusi Nova, Khuzani, Hlonti, Sjava, Professor, Mandla Magwaza, DJ Mngadi, Nhlaks nabanye. Uhlelo luzobe luphethwe nguSomizi noKhanyi Mbau. Amatende okulindeleke ukuthi abe khona kubalwa iThe Legend VIP Marquee okuzobe kudlala kulo uDJ Mngadi, Khetha Gwala, Nastor, Distruction Boyz nabanye. Esiteji esikhulu kuzoba noNoma Khumalo, Mfezemnyama, Andile KaMajola, Gukwa, Duncan, Babes Wodumo nabanye.