Ubhodla umlilo ngezinsolo uMbuli
MBONGI yodumo ephinde ibe ngumculi kuleli isiludlulisele kubameli udaba lokusolwa kwayo ngokuqola ngamaciko ashonile ukuzicebisa yona, olusabalele ezinkundleni zokuxhumana.
UMzwakhe Mbuli obizwa ngeMbongi yaBantu, uthe lezi zinsolo zimehlisa isithunzi njengoba kuthiwa uqoqa imali emindenini yamaciko ashonile ukuze athole intshotsho.
Uthe usejube ummeli wakhe u-Advocate MJ Koma ukubhekana nalolu daba. Utshele Isolezwe ukuthi onobufakazi ngalezi zinsolo akaye emaphoyiseni ukuze kugezeke igama lakhe ngoba naye akekho ngaphezu komthetho.
Lezi zinsolo zisuswe yintatheli yezemidlalo yomsakazo waseGoli, ethe ihlobene nomndeni kaMandoza nawo okuthiwa wagilwa wuMbuli.
Le ntatheli ephesheya ngomsebenzi, ithe konke ekubhale kwiTwitter ngoMbuli izokumela futhi uma ibuya ayinankinga ukubhekana naye.
Kulezi zinsolo kuthiwa uMbuli nezinye izingqalabutho zamaciko, ufika emndenini oshonelwe athembise ukuletha usizo, abuye ayongqongqoza eminyangweni kahulumeni ecela imali.
“Ongqongqoshe babanika imali kodwa bayigcine enye benze sengathi abayitholanga eyanele. Ngikhathazekile ukuthi uMzwakhe useqalile ukhuluma ngokushona kukaRay Phiri kanti uhlose ukuzontshontsha imali nakhona,” kusho intatheli.
Iveze nokuthi emndenini kaMandoza uMbuli wazama ukuqola umndeni ngendawo yomngcwabo, ukudla nangezinsimbi. Lezi zinsolo ziphawulise abaningi kwiTwitter bethi uMbuli kade aqala ukufuna
Iukugqama ngokushona kwabantu.
Eziphendulela uMbuli uthe akakaze aqoqe imali yanoma yiliphi iciko, kunalokhu ucelwa wumndeni ukuphatha uhlelo.
“Kushone uMandoza ngacelwa wumkakhe uMpho ukuthi ngizophatha uhlelo. Kwale sengisho ukuthi kade ngihlinzwa umphimbo, bangicindezela ukuthi ngivume. Akukho mali engayiqoqa, engikwaziyo wukuthi uMpho wayenenkinga yokuthola indawo eyagcina ikhokhelwe wuhulumeni u-R90 000,” kuchaza uMbuli.
Uziqhelelanisile nokuthi waba neqhaza enkonzweni yokukhumbula uMandoza njengoba esolwa ngokufuna ukuletha izinsimbi ebezizokhokhelwa. Kuthintwa uMpho uthe abantu abanezinhloso zabo bangafaki igama likaMandoza.
“Ngeke ngiphawule ngezinto eziwubulima engingazi zivelaphi. Abantu abahlukane nokusebenzisa uMandoza uma benezinhloso zabo. Ngikhathele yile ndaba, kuthintwa nezingane zami ngayo.” UMzwakhe uthe akulona icala lakhe uma imindeni ithemba yena ukuzophatha inkonzo yomngcwabo, lokhu akwenza mahhala. Ulinganise ngomndeni kaDavid Masondo weSoul Brothers athe wacelwa yiwona. Uphinde waveza ukuthi umndeni kaMnuz Bethuel Ngubane obesebenza naleli qembu ozongcwatshwa ngoMgqibelo, usumcele ukuzophatha uhlelo.
“Sekunzima nokuvuma kodwa abakwaNgubane bangincengile ukuthi ngibaphathele uhlelo. KwaPhiri bengikhuluma njengawo wonke amaciko abebhonga emswaneni. Senginqume ukungakhulumi, uma ngiya emngcwabeni ngizobe ngiyothamela kuphela,” kusho uMbuli.
Kuthintwa abakwaNgubane baqinisekisile ukuthi bacele uMbuli azophatha uhlelo. UMnuz Spha Masondo uthe uMbuli wacelwa wumndeni ukuphatha uhlelo futhi akunamali akhokhelwa yona noma ayiqoqela umndeni.
Okhulumela iCreative Workers Union of SA uMabutho ‘Kid’ Sithole, uthe kumele ziphenywe lezi zinsolo kodwa ngeke aphawule kusengamahlebezi. “Uhlelo engilwaziyo lwezingqalabutho, olokuthuthukisa amaciko asafufusa. Alukho oluhlangane nokushona kwamaciko. Uma kukhona abathinteka kulezi zinsolo kumele bakhuzwe.”