‘Udlwengule’ indodakazi yakhe oncishwa ucansi
USOLA ukujeziselwa ukunqaba nocansi owesifazane waseMayville eThekwini, othi udlwengulelwe indodakazi eneminyaka emithathu nguyise wayo.
Lo wesifazane oneminyaka engu-29, usethuka izanya njengoba isoka lakhe elinguyise wengane edlwenguliwe liboshwe ladedelwa. Uthe usola ukuthi isoka lakhe kade laqala ukugila indodakazi yakhe, abeyishiya nalo njalo uma eya emsebenzini.
“Saqala ukuthandana naye ngo-2013, sathola ingane ngo-2014. Uyena ebengimshiya nengane ngoba akasebenzi, ngihamba ekuseni kakhulu ngibuye sekuhlwile. NgoLwesithathu ingane yabika izinhlungu esithweni sangasese, ngayobikela isihlobo sami. Sithe uma sibuza enganeni yathi uyise uyiphe ushokoledi nama-chips, wambatha nayo wayifaka itotolozi,” echaza.
Uthe isihlobo sakhe siphakamise ukuthi kushayelwe amaphoyisa, afika abayisa esibhedlela e-Addington. Lo wesifazane uthe udokotela ohlole ingane uqinisekisile ukuthi idlwenguliwe futhi kukhombisa ukuthi ayiqali. Uthe umsolwa wathathwa ngamaphoyisa ngoLwesine phambi kwakhe unina wengane abebehlala naye wabuye wadedelwa.
“Besihlala naye silala embhedeni owodwa nengane. Besingasezwani kahle ngoba ubengifuna ngenkani ucansi ngibuya emsebenzini ngikhathele. Bengisanda kuthola nokuthi ukhulelise enye intombi,” kusho yena.
Lo wesifazane uthe okumenza asabe wukuthi umsolwa uyabonakala ecanasa endaweni futhi uyamsabisa. Okumdidayo ukuthi ngoLwesihlanu kwafika abazibize ngamaphoyisa bathi bazolanda izingubo zikamsolwa. Uthe umsolwa ubuye wafika endlini ezomsabisa, ephika nokuthi udlwengule ingane yakhe.
Izolo lo wesifazane ubesenkantolo eyokwenza incwadi yesivimbelo, wathola ukuthi umsolwa uvelile enkantolo ngaleli sonto wabuye wadedelwa ngoba ubufakazi bungekho
“Ngikhathazekile ngoba ingane ayikho esimeni esifanele nami ngiphazamisekile emqondweni.”
Okhulumela amaphoyisa KwaZulu-Natal, uColonel Thembeka Mbhele, uthe kuphenywa icala lokudlwengula elivulelwe owesilisa osolwa ngokudlwengula indodakazi. Uthe umsolwa waboshwa, bekumele avele enkantolo ngaleli sonto.