Kuhlukene imibono ngezifundazwe
KUHLUKENE imibono mayelana nesiphakamiso se-ANC sokuthi kwehliswe isibalo sezifundazwe sisuke kweziyishiyagalolunye zibe yisithupha.
I-ANC engqungqutheleni yayo yemigomo eNasrec, eGoli, iphakamise ukuthi zincishiswe izifundazwe zibe yisithupha ngoba ikholwa wukuthi lokhu kungasiza ekusheshiseni uhlelo lokuhambisa izidingo kubantu, kuphinde kulondoloze nemali yabakhokhibentela enikezwa izifundazwe.
Umhlaziyi wezepolitiki ozimele KwaZulu-Natal, uMnuz Bukani Mngoma, uthe akaboni ukuthi yiluphi ushintsho olungadalwa wukwehlisa isibalo sezifundazwe.
UMngoma uthe inkinga kayidalwa yisibalo sezifundazwe kodwa idalwa yipolitiki.
“Akunankinga ukuba khona kwezifundazwe into okumele yenzeke ukuthi akumele zilawulwe ngosopolitiki kodwa kumele zilawule ngabantu nje abafana nezimenenja zemikhandlu abangachemile,” kusho uMngoma.
Uthe izinkinga ezikhona zidalwa ukuthi kunezinhloko eziningi zezepolitiki.
“Uma izifundazwe zingalawulwa yizimenenja kungongeka imali eningi,” usho kanje.
UMngoma uthe ucabanga ukuthi i-ANC ishaya isikhala uma ifuna ukwehlisa izifundazwe ngoba uma zincishiswa kukhona ezizohlanganiswa bese ziba nkulu kakhulu bese kwengeza izinkinga.
Omunye umhlaziyi wezepolitiki ozimele, uMnuz Thabani Khumalo, yena uthe ubona ukuncishiswa kwezifundazwe kungasebenza.
“Uzokhumbula ukuthi i-ANC ayikaze ihambisane nokuthi kube nezifundazwe eNingizimu Afrika. Le nto esiyibonayo yokuthi ezweni elilodwa kube ‘namazwe’ ayisishiyagalolunye, kwaba yisinqumo esathathwa sekwenziwa nje ezingxoxweni zeCodesa eWorld Trade Centre,” kusho uKhumalo.
UKhumalo uthe ukuba khona kwezifundazwe kuphambene nephupho le-ANC lokwakha iNingizimu Afrika ebumbene.
“Yinto lena i-ANC okumele iyilungise ngokuhamba kwesikhathi. Ngingomunye wabantu abahlale bezibuza ukuthi yini umsebenzi wezifundazwe. Ngokwami ukubona kumele ngabe sineminxa emibili kahulumeni, okazwelonke nowasekhaya,” kusho uKhumalo.
Uthe ukuba khona kwezifundazwe kwenza kuhambe kancane ukuhanjiswa kwezidingo kubantu ngoba kubuye kube khona ukushudilisana okugqugquzelwa yipolitiki.
I-ANC iphusha indaba yokuthi zincishiswe izifundazwe, okuyisiphakamiso esikhalisa amaqembu aphikisayo.
Amaqembu aphikisayo athi isiphakamiso sihlobene nezepolitiki ngoba yi-ANC efuna zinciphe.
I-ANC isiphakamise ukuthi kusungulwe iKhomishini ezolubheka udaba ngoba ifuna kuyiwe engqungqutheleni yokukhetha ubuholi ngoDisemba sekucacile ukuthi kuzokwenzekani.
Ilungu lesigungu esiphezulu kwiANC, uMnuz Obed Bapela, ucashunwe kwabezindaba ethi ikhomishini izobheka amandla nomsebenzi wezifundazwe wakuchitha ukuthi i-ANC iphusha isiphakamiso ngoba isaba ukhetho luka-2019.