UGigaba nohlelo lokufukula umnotho
LUZOGQUGQUZELA abatshali bezimali ukuthi bafukule umnotho waseNingizimu Afrika uhlelo olunamaphuzu awu-14 olwethulwe izolo nguNgqongqoshe weziMali, uMnuz Malusi Gigaba.
UGigaba uthe umnotho awukhuli ngendlela efanele futhi siphezulu isibalo sabantu abaswele umsebenzi uma uliqhathanisa neminyaka ewu-13 edlule.
Uthe uhulumeni uzokwenza isiqiniseko sokuthi unciphisa izinga lokungalingani phakathi kwabampofu nabacebile ngokugqugquzela abatshali bezimali ukuthi bafake imali yabo ezweni.
Ngo-Okthoba nonyaka uhulumeni uzonciphisa izinhlelo zokutakula izinkampani zakhe.
Abaholi bezinkampani zikahulumeni bazokhethwa ngendlela efanele kucaciswe nangohlelo lwamasheya alezi zinkampani.
Izinkampani ezizimele zizothintwa ukuze zilethe imibono yazo ngokufanele kwenzeke ukuthuthukisa umnotho.
Kuzophela ukuthi izinkampani zikahulumeni zithenge impahla ebizayo ngoba kuzoba nemigomo yokuthi kumele zithenge impahla ebiza kangakanani. “Sizoxoxa neNational Energy Regulator (Nersa) ngokunyuswa kwezindleko zikagesi, siyichazele ngezinkinga ze-Eskom ungakapheli umashi wonyaka ozayo. I-Eskom izoxoxisana neNersa ichaze ukuthi kungani izonyusa izindleko zikagesi nokuthi izozinyusa ngamalini nokuthi malini okufanele ikhokhwe ngumphakathi.”
Mayelana nodaba lwase-SAA, uthe isikhulu esiphezulu sizoqokwa ungakapheli uJulayi nezikweletu zizokhokhwa kube nohlelo olucacile lokusebenza kwemali ungakapheli u-Okthoba.
Kuzokwandiswa izindawo ezine-internet eNingizimu Afrika.
Uthe iposi kufanele libe nelayisensi yokusebenza njengebhange kungakapheli unyaka.
Kuzobhekwa ubunikazi bomhlaba. Udaba luzodingidwa ungakapheli u-Okthoba.
UMnuz Bukani Mngoma, oyisazi somnotho esizimele, uthe lolu hlelo luzofukula umnotho waseNingizimu Afrika luwukhiphe kwinzikamnotho ngoba lunesikhathi olunqunyelwe ukuthi izinto zibe sezenzekile.
“Bekudingeka ukuthi uNgqongqoshe atshele abatshali bezimali ukuthi izwe kukhona elikwenzayo ukulikhipha kwinzikamnotho. Siyathemba ukuthi bazokubona lokhu bagqugquzeleke ukuthi batshale imali bafukule umnotho kuvuleke namathuba omsebenzi,” kusho uMngoma.
UMnuz Cees Bruggemans, isazi sezomnotho, uthe uma lolu hlelo lusetshenziswa kuzoxazululeka izinkinga zomnotho okubalwa kuzo ukungabikhona komsebenzi nenzikamnotho.