Ingenwa yiNdlunkulu eyemiphumela ka-matric
INGENWA yiNdlunkulu kaZulu eyokuphuculwa kwemiphumela ka-matric nokugqugquzela isiko lokufunda nokufundisa KwaZulu-Natal njengoba Isilo samaBandla sizovakashela izikole sixoxe nothisha nothishanhloko ngokumele kwenziwe ukuze imfundo ithuthuke.
Lokhu kuvezwe nguNgqongqoshe wezeMfundo uMnuz Mthandeni Dlungwane, izolo othe kuzothi uma sekuvulwe izikole bahambele izifunda ezehlukene begqugquzela ukufunda.
UDlungwane uthe lena ngenye yemizamo yokuphucula imfundo nemiphumela ka-matric njengoba isifundazwe sifuna ukunyusa izinga ngo10% libe ngu-76% ngonyaka ozayo.
“Sizohambela izikole ezahlukene neSilo ukuze sithole ukuthi kungani ezinye zezikole zenza kabi. Sizogqugquzela ukufunda nokufundisa.”Okhulumela iNdlunkulu, uMntwana Thulani Zulu, uthe iMbube izovakashela izikole njengomzali nomuntu okhathazekile ngezemfundo. “Sinethemba lokuthi iSilo sizokhuluma sizwakale ezikoleni uma sesizivakashele nongqongqoshe ngoba imfundo yinto esondelene kakhulu neMbube. Isilo sizonxusa ukuthi kubuyiswe isiko lokufunda.”
UDlungwane, obethula izinsuku ezingu-100 ngaphambi kokubhalwa kumatric ngo-Okthoba, uphinde wakugcizelela ukuthi ngeke bahlonize ukuthatha izinyathelo kothishanhloko, abahloli abathola imiphumela engemihle ikakhulu u-0%.
“Senze konke okusemandleni ukweseka izikole ezithole u-0%. Ngonyaka ozayo azikho izikole ezizothola u-0% ngoba sizesekile,” kusho uDlungwane.
Uthe bangaphezulu kuka-150 000 abafundi abazobhala u-matric kulo nyaka, kulaba bangu-28 000 abaduduliwe.
“Kulaba abaduduliwe akubona bonke abazobhala zonke izifundo, abanye babo bazobhala ezimbalwa kulo nyaka baphinde babhale ezinye ngoba ozayo. Siyaxoxa nabo sithole ukuthi ibaphi abazokwazi ukuzibhala zonke izifundo zabo,” kusho uDlungwane.
Uthe kumele kushaye u-Agasti 31 kube sekuphothulwe isilabhasi ezikoleni ukuze kubuyekezwe.
“Njengoba sethula izinsuku ezingu-100 ezisele, bafundi ibambeni iqine, niphumule kancane bese nibuyela ezincwadini. Asisekho isikhathi sokujabula nokuzithokozisa, fundani,” kusho uDlungwane.
UDlungwane uthe uchazekile ehambele eMlaza ngoLwesithathu ngaphansi kohlelo iSukuma Sakhe kahulumeni wesifundazwe.
“Ngijabule kakhulu, mkhulu umsebenzi owenziwa uMphemba (Bheki Ntuli, uMqondisi wezemfundo esifundeni uMlaza), nethimba lakhe. Abafundi bayazinikela ungathi izikole ezivuliwe,” kusho uDlungwane.
Uthe bafuna ukuqeda ngezikole ezithola ngaphansi kuka-30% kulesi sifundazwe.