Sikhulu isililo ngokushiywa nguChikapa

UMA kungathiwa umuntu akabophele isikimu sebhendi ezomela elakuleli emazweni angaphandle, belingeke lisale nangephutha igama lenkakha ye-Afro jazz uRay Phiri.

Kuma-drums bekungaba u-Isaac ‘Mnca’ Mtshali, kwesebhesi kube wuBakithi Khumalo, kuma-percussion kube uMabe Thobejane, kuma-keyboard kube wuBlack Moses kanti kwi-lead guitar bekungaba nguye kanye uBra Ray. Isigingci ubengasidlalisi, ubesixebula. Nasekuqambeni izingoma ubenekhono eliyisimanga kangangoba ubungeke waqonda ukuthi ukhuluma ngani.

Lokhu ungakuzwa engomeni yakhe eyayithi Whispers In The Deep (Awuphinde Mzala).

Leli noni lavalwa kodwa bambalwa ababengakutshela ukuthi likhuluma ngani. Ubenkondlozisa!

Okumangazayo wukuthi ukwitiza isiNgisi esidida nezifundiswa nje kodwa wagcina kuGrade 11 esikoleni.

Ubenekhono elingandele bani lokuqamba ingoma engasoze yabuna.

Izingoma eziningi zeStimela zisashisa izikhotha namanje yize zaqanjwa eminyakeni engaphezu kwewu-30 eyedlule.

Abanye abaculi bafelwa yizingoma zabo besaphila kodwa kuBra Ray kushone yena nje kodwa izingoma zakhe zisazoqhubeka nokuduma futhi zisazophila eminye iminyaka.

Ukuthandwa kwezingoma zeStimela akugcinanga emphakathini kuphela kodwa zibuye zachaza nabanye abaculi abenza olunye uhlobo lomculo njengomrepha uYoung Nations owenza kabusha ingoma ethi Zwakala kwathi uDJ Cleo wadidiyela kabusha ethi Go On Living Your Life.

Le nkakha ibingagcini ngokuxebula isigingci nokumpongoloza ngephimbo layo kodwa ibibuye ikushiye ubambe ongezansi ngemidanso yayo ebandakanya nesipantsula bese ilingisa nabantu abakhubazekile.

IStimela sife olwembiza ngempela ngokushiywa yile ngwazi futhi nesizwe sonke siyalila.

Hamba Kahle Chikapa!