Baqasha emafulethini abizayo bashiye emakhaya kubolile
MHLELI: Ngivumele ngibeke umbono wami mayelana nabantu abathanda ukuhlala emafulethini abizayo kodwa bebe bengenalutho emakhaya.
Kunabantu okubafanele ukuqasha noma ukuhlala emafulethini ngoba emakhaya kukude nalapho besebenzela khona, bese kuba nabathanda ukubukwa noma ukuzenza abantu abanemali bebe bengenalutho.
Kulabo bantu abahlala emafulethini, bakhona abakwaziyo ukuthi ngelinye ilanga bayogula bese kumele bagodukiswe bayiswe emakhaya abo. Ngaleyo ndlela bazihlelile izinto emakhaya, bakhile noma babakhele abazali babo.
Kukhona laba asebabhungukela emafulethini abangenayo ngisho inkomishi yokuphuza itiye kubo, abangenawo ngisho umbhede. Kufikisela amahloni ukubona usaziwayo othize ohlala emafulethini abizayo, osekuphele iminyaka agcina ukuvakasha ekhaya ngoba enganayo indawo yokulala kubo, uza ekhaya kuphela ngoba kushoniwe noma kunomcimbi othize.
Abantu abaningi baphila impilo yokuzicindezela, impilo emdlayo ngaphakathi. Kunabantu asebesaba ukugoduka baye emakubo ngoba kungaselula ukuqala impilo yasekhaya sebejwayele impilo ephambili ewubukhaziklhazi yasemadolobheni emafulethini.
Bayazi ukuthi uma begoduka kuzomele bakhe indlu, bafake ifenisha, bathenge nokudla okuzophekwa wumndeni wonke, hhayi lokho okuthengwa sekuphekiwe.
Ngiyambongela mina umuntu osekhethe le mpilo uma ezohlala khona aze afele khona, aye ekhaya ngoba eseyongcwatshwa ngoba leli hlazo lakhe noma abangani bakhe bangalibona, ngeke kodwa yena abuzwe ubuhlungu bokuthi waqamba amanga wathi ekhaya wakhile kanti akenzanga lutho, ufika njengesivakashi angalali.
Baningi abantu abafuna ukwaziwa njengabantu abanemali kodwa uma usuthola kabanayo leyo mali, baphila ngezikweletu.
Umuntu makangaphoqi ukuphila impilo engamfanele ngoba efuna ukubukwa noma ukudlisa kubantu ngoba ekugcineni eselele yedwa kuyamudla ukuthi uphila impilo yamanga. O’BRIEN “SCARA” GCABASHE ENANDA