Amakhosi azogijima ngejezi elisha
BAZOLINDA kuze kube ngasekupheleni kwenyanga abalandeli beKaizer Chiefs ngaphambi kokubona izinduku zabo ezintsha zidlubhe umfaniswano omusha weqembu eliwethule izolo ngokusizana nabakwaNike ezinkundleni zokuxhumana ezahlukene zeziMpofana.
Abadlali abasha beChiefs abafana noTeenage Hadebe waseZimbabwe, Bongolwethu Jayiya obekuCape Town City noPhilani Zulu abamthole kuMaritzburg United ngeke babonakale begqoke leli jezi kusasa koweBokone Bophirima Maize Cup abazoba yingxenye yayo ngokuhlanganyela neTownship Rollers yaseBotswana, Free State Stars nePlatinum Stars oseJames Motlatsi Stadium kusasa. Ngokusho kwaMakhosi, leli jezi bazoze baqale ukudlala ngalo kuCarling Black Label Cup abazoyidlala ne-Orlando Pirates ngoJulayi 29 e-FNB Stadium, eGoli.
Ijezi elisha leChiefs lasekhaya nelasekuhambeni lesizini ka-2017/2018 livezwe emphakathini okokuqala izolo emini. Uma belichaza bathi lakhiwe ngendlela yesimanjemanje kodwa umqondo ubusekutheni likhombise umlando weqembu kodwa lingasukile emibaleni yalo omnyama nosagolide.
“Obekusibusa sisizana noNike sakha leli jezi ukugcina umlando weqembu nendlela esaziwa ngayo emphakathini. Ubuchwepheshe obusetshenzisiwe lakhiwa kuzobasiza abafana uma besenkundleni ukuthi bazishibilikele futhi bebukeka bekhazimula,” kusho uJessica Motaung oyiMarketing Director yeqembu.
Uqhube wathi: “Elingichaza kakhulu elasekhaya. Izikwele ezisuka emikhonweni zize ziyovala emqaleni wejezi zingishaya ngaphakathi ngoba lizohambisana kahle nesikhindi esisagolide namasokisi azoba umbala ofanayo. Izikhala ezisemaceleni kusukela ekhwapheni kuze kwehlele esikhindini kuzobenza banyakaze kalula abafana enkundleni bebe beshaywa wumoya ongena uphume kulezi zikhala.”
Uthe lizotholakala maduze ezitolo.
Elasekuhambeni lona THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50. elimnyama ligqize ngemibala esagolide evundla esifubeni nangemuva. Linomqala oyindilinga osagolide bese ligqokwa nezikhindi ezimnyama namasokisi asagolide. Ubuchwepheshe obusetshenzisiwe buyafana nobelasekhaya. Kukhona nelabesifazane elakhelwe ukuba lingene khaxa emizimbeni yabalandeli balobu bulili.
Iningi labalandeli eliphawule ngejezi kuFacebook nakwiTwitter belincoma kodwa lithi kuzoba kuhle uma umswenko uzohambisana nemiphumela. IChiefs sekuphele amasizni amabili ingawini lutho.
“Lihle impela ijezi kodwa okusikhathazayo singabalandeli izinga labadlali. Sengathi kuzoba yimpinda yangesizini edlule,” kusho uLinda Mkhwanazi kuFacebook.
UKing Maker SA, uthe: “Lihle kodwa sifuna abadlali abaseqophelweni abazogqoka leli jezi. Siyacela ningasideleli sidinga imiphumela emihle ngesizini ezayo.”
U-@MsMiso_S kwi-Twitter, uthe: “Lalilhle ijezi, ngithemba ukuthi abadlali bazowenza owabo umsebenzi kule sizini.”
ISundowns ngelinye iqembu elisanda kwethula ijezi elisha nabaxhasi bayo iPuma. Elasekhaya linombala ojwayelekile ophuzi, elasekuhambeni limhlophe bese kubakhona eli-navy.