Imigilingwane yevolovolo
lwakwaVolvo. Amalambu ayo ayiLED anama-daytime running lights akhanyisa ngathi yisemini.
Amasondo ehamba ngawo angu19-inch alloy wheels. Ngemuva inamalambu eLED amise okukaC. Ngezansi inezinqawe ezimbili emaceleni womabili.
Uma ungena ngaphakathi yilapho ufike ubone khona ukuthi usemotweni esezingeni eliphezulu. Inezihlalo zesikhumba ezintofontofo. Ezangaphambili ziqondiswa ngebhathini futhi ziyakwazi ukuthi zishise.
Okugqamile yi-infotainmnent ene-screen esingu-9 inch esifana naleso esikwiXC90. Iscreen lesi siveza izinto eziningi zemoto kusukela kwezokungcebeleka, ukuxhuma iselula, ukuhlela amazinga okushisa nokubanda ne-navigation.
Yisona lesi screen lapho kuvela khona amakhamera akuvezela umzimba wonke wemoto uma upaka nokunye.
INavigation yayo ingichazile ngoba ikutshela ngisho umgwaqo ulungiswa okwesikhashana nejubane okumele uhambe ngalo kuleyo ndawo ngoba inekhamera efunda sonke isimo somgwaqo.
Ngakwezokungcebeleka inezipikha ezingu-10 ezigqomayo zeBowers & Wilkins futhi idlala iBluetooth, USB, aux kanjalo neCD. IneWiFi eyenza ukwazi ukudlala imisakazo ye-internet.
Ukwazi ukubuka izithombe nma-video ayiHD uma ipakile.
Ngaphezu kwesiteringi ine HD digital instrument cluster engu-12.3 inch.
Njengoba kuyimoto enkulu nje, abagibeli abahlanu bahlala ngokukhululeka futhi ibhuthi layo lingudedangendlale. Iyazishayela
Le moto iyakwazi ukuzihambela ngejubane elifinyelela ku-130km/h. Ine-Adaptive Cruise Control eyenza ukuthi izibhrekele uma kunesidingo futhi iphinde ihambe ngejubane oluhlelile eligcina ku-200km/h.
IPilot Assist yona yenza ukuthi isiteringi siziqondele futhi uma ujika ikhona elincane izijikele yona. Idinga ukuthi ubeke noma isandla esisodwa esiteringini okuthi uma usiyekelile ihambe ibanga elithize bese iyakutshela ukuthi sibambe.
Engikuqaphelile kodwa wukuthi uma ufuna ukuyilekelela isiteringi sithi ukuqina kancane kumele ufake amandla.
Konke lokhu kudinga ukuthi umgwaqo ube nolayini.
Le Pilot Assist inhle kakhulu uma uhamba edolobheni kunesiminyaminya.
Injini yayo ingu-2.0 litre kadizili ekhiqiza amandla angu173 kW ne-torque engu-480 Nm. Yize bethi i-turbo lag ayikho kodwa ngiyizwe ikhona encane eyenza ukuthi imoto kube ngathi kukhona okuyibambayo kancane ngaphambi kokuthi ingene ejubaneni.
Uma isisemgwaqeni ovulekile iwubukhosi futhi ayizwa nantaba namehlo ngoba inamandla.
Ngebanga lika-100km bathi isebenzisa amalitha angu-4.8 kanti ukusuka ku-0 iye ku-100km/h kuyithatha imizuzwana engu-7.0. Mina ngebanga lika-100km/h angisondelanga nakancane kulo-4.8 kodwa inginikeze u-8.5.
Umshayeli uyakwazi ukuthi akhethe ukuthi ufuna ihambe kanjani phakathi kukaComfort, Eco noDynamic.
KukwiDynamic lapho iwakhipha khona wonke amandla ayo iphinde inamathele nasemgwaqeni.
Isiteringi nokho siyasinda kancane uma ujika amakhona.
Okunye okuyisiza ukuthi ibambelele ukuthi idonsa ngawo womane amasondo.
Ngaku-gearbox ine-8speed Geartronic automatic transmission. Iqhubeka ekhasini 5