Kwethulwe iDiscovery entsha kuleli
DISCOVERY entsha yakwaLand Rover isithuliwe ngokusemthethweni eMzansi. Lokhu kuzojabulisa labo abathanda ukubona ubuhle bezwe lethu behamba nomndeni behamba ngobuntofo nalabo abafuna i-SUV esesitayeleni nsukuzonke.
Uma ubheka izimoto ezithulwe abakwaLand Rover kulesi sikhathi, uyabona ukuthi isakhiwo sazo sisesigabeni sezimoto ezakhelwe ukudonsa amehlo ngobuhle.
I-Discovery entsha nayo isuselwe kwi-Discovery Vision Concept eyadonsa amehlo ithulwa.
Yize ikhombisa ukushintsha ngesakhiwo lapho isithandeka kubantu besitayela, izinto ezadumisa amaDiscovery amadala azishiywanga ngaphandle.
Lokhu sibala kukho ukuphakama kabili kokhakhayi, icala elinamawindi amakhulu ukwenza kubonakale kalula ngaphandle nesakhiwo esenza ukhakhayi lubukeke sengathi aluxhumene nomzimba.
Ngaphambili ihlanganisa amathoshi e-LED, amathoshi asemini e-LED ne-grille esadayimane, okwenza ibe namandla kwabayibukayo.
Emaceleni ikhombisa ubukhulu obungeziwe ukuyenza ithwale kahle umndeni. Amathayi asuka ku-19 inch agcine ku-22inch ngokuhambisana nohlobo oluthengayo. Ngemumva ifika namathoshi e-LED nesivalo esikhulu esisodwa esenza kube lula ukufaka izimpahla. Ukushintsha kwesitayela seDiscovery entsha kungenzeka kungahlali kahle kulabo abathanda isakhiwo seDiscovery endala lena emise okwebhokisi kodwa labo abathanda isitayela bazozifela ngayo.
Uhla lwezinhlobo zeDiscovery luqala kwi S, kube yi SE, ne HSE kugcine nge HSE Lux. Kukhona ebizwa nge-First Edition efika nesakhiwo nobuchwepheshe obuhlukile futhi okuzodayiswa isibalo sayo esikaliwe.
Ingaphakathi leDiscovery entsha lihlanganisa isakhiwo esiseqophelweni eliphuzulu futhi yenza kube lula ukuthwala umndeni.
Abantu abayisikhombisa abadala bahlala ngokunethezeka bese kuthi labo abasezihlalweni zokugcina bahlale ngokuphakama okwenza babone kalula ngaphandle.
Ubuxhaxha bezinkinobho zokulawula umsakazo nokushintsha ukusebenza kweDiscovery kwenziwe kwaba kuncane futhi kwalula kakhulu njengoba okuningi sekulawulwa ngokuthinta i-InControl Touch Pro, Touchscreen Infotainment System. Ubukhulu be screen sokulawula kungaba u-8 inch noma u-10 inch.
Obunye ubuchwepheshe efika nabo le moto yi-Intelligent Seat
IFold eyenza kube lula ukulalisa izihlalo zangemumva.
Lobu buchwepheshe kwenza umnini wemoto akwazi ukuzilalisa lezi zihlalo engekho eduze nemoto esebenzisa umakhalekhukhwini (Smartphone) uma une-App yakhona kwaLand Rover.
Ngaphakathi ayiyinkulu nje ukwenzela ukuthwala abantu kodwa abakwaLand Rover benze izindawo eziningi ngaphakathi ukubeka izimpahla ezincane ezinjengama iPads noma omakhalekhukhwini. Okunye okwenza impilo ibe lula ukuba khona kwezindawo ze-USB eziyisishiyagalolunye (9 USB Ports) ngaphakathi kweDiscovery entsha. Izinjini namandla Kukhona ekadizili iTDV6 engu-3.0 litre V6 Turbo diesel. Inamandla angu-190 kW netorque ka-600 Nm. Ngebanga lika-100km bathi isebenzisa amalitha kadizili angu-7.8. Ijubane elikhulu ngu209 kanti ukufika ku-100km/h kuhyithatha imuzuzwana engu8.1.
Ekaphethroli yiSi6 nayo engu3.0 V6 Turbo Petrol. Inamandla angu-3.0 netorque ka-450 Nm. Ngebanga lika-100km idla amalitha kaphethroli angu-11.5. Ukusuka ku-0 iye ku-100km/h kuyithatha imizuzwana engu7.1 kanti ijubane layo elikhulu ligcina ku-215km/h.
Wonke amaDiscovery amasha afika no-gearbox ozishintshayo onamagiya ayisishiyagalombili (8-Speed Automatic).
Abakhi bayo bathembisa ukuthi njengoba ifika ne-suspension yomoya (air suspension) ubuntofo bayo busezingeni eliphezulu kakhulu.
Lobu buntofo buhlangana nokuhamba kalula uma umgwaqo uba udaka, uba namatshe noma uma umshayeli ehamba lapho umgwaqo ungabonwa.
Ubuchwepheshe obutholakala kumaLand Rover kuphela obunjenge All Terrain Progress Control ne-Terrain Response 2 Auto kwenza kube lula ukuyilawula odakeni ngisho noma ngubani oshayelayo.
Kukhona nobuchwepheshe obusiza kakhulu kulabo abadonsa izinqola njengoba ikwazi ukwenza kube lula ukufaka nokukhipha inqola edonswayo.
Ukuvikeleka kwabagibeli beDiscovery entsha kube yinto abayibeka phambili abakwaLand Rover njengoba befake bonke ubuchwepheshe bokuvikela izingozi nokwehlisa ukulimala uma iba sengozini. Amanani: S TDV6 R980 000 S SiV6 R1, 018 500 SE TDV6 R1, 109 250 SE SiV6 R1, 126 750 HSE TDV6 R1, 223 000 HSE SiV6 R1, 240 500 HSE Lux TDV6 R1, 314 000 HSE Lux Si6 R1, 331 500 First Edition TDV6
R1, 440 000 First Edition SiV6
R1, 457 500