Akuphephile ukushisela imoto ehlane
NGIVUKWA wusinga oluthi mangiyikhuze ilalele imakwethu ngiyiqoqe maqede ngiyikhombe eceleni lapho kuphephe khona, ngibe ngicela bonke abanye abashayeli nabalandeli bale ngosi ukuthi benze okufanayo.
Awanamhlanje ama-hazard ngiwashaya nje ngiseSikhaleni ebiyaziwa ngeSikhawini.
Ngihamba ngomgwaqo obheke ekolishi lendawo iMfolozi TVET, ngibona izimoto ezibonakalayo ukuthi zingamashabhu ahambayo zimbozwe ngoseyili, zipake phansi kwesihlahla kule nhlanganamgwaqo ewu-T.
Kukhona iveni eliwudidunwabu ngoba lisho ngemibala eminingi okucacayo ukuthi selapheshwa ngothayela bazozonke izimoto lezi kodwa langapendwa kabusha. Umbhemu okhona uma eqeda kwembula useyili kuvela izimboxela zamabhodlela okushisela nezinqamu eziningi zemibhobho yokukhipha intuthu emotweni. Kuyangicacela ukuthi lo mnumzane uyashisela.
Emva kokubona leli shabhu elihambayo lima esigangeni licupha izinto ngononina ukuze kuqale umsebenzi wokushisela izimoto ezidingayo, ngibe sengikhumbula eminyakeni edlule ngaseBhamshela oZwathini lapho omunye umuntu owayeshisela izimoto emzini wakhe. Wagcina eyeka ukusebenza emva kokuthi ethe uyashisela imoto yavele yagqamuka amalangabi. Ngizamile ukuqalaza eduze kwale ndoda ukuthi sikhona yini isicishamlilo, angisibonanga. Ngizibuze ukuthi njengoba umthetho udinga isicishamlilo emotweni ethutha umphakathi ngisho ingathwele lutho olungavutha noma nini, manje-ke lapho kushiselwa khona kufanele nakanjani kube khona isigubhu sesicishamlilo.
Okuphinde kube bucayi wukuthi le ndawo iphakathi kwemizi yabantu. NakuM25, eNanda ngaseDube Village nakhona kukhona abafo abashiselayo. NaseClare Estate emgwaqweni uClare kunamadoda ashiselayo kodwa akukho zicishamlilo kuzo zonke lezi zindawo. EMadadeni nakhona ngike ngayibona le nto yabantu abama nemigxusho yamabhodlela okushisela esigangeni. Ngesinye isikhathi udlula kukhona imoto esetshenzwayo kodwa uma uthi uyaqalaza awuboni hlelo lokugada ingozi yomlilo kodwa kudlalwa ngawo umlilo. Umbuzo uthi omasipala bathula bathini abantu befensa ingozi emini kwabha.
Uma uhambisa imoto yakho lapho kushiselwa noma kukhandwa khona kuvamise ukuthi uthole kubhalwe ukuthi imoto uyiletha ngokwakho abanikazi bendawo, yize bezoqinisekisa ukuphepha kwayo kodwa abahlangene nomonakalo ongehlela imoto yakho. Ngiyabaqonda omakhenikha ebesikhuluma ngabo ngesonto eledlule ukuthi bona abawuphathi kangako umlilo ngezandla manje lona-ke ovula umlilo bukhoma kungekho lutho lokubhekana nesimo somlilo umethemba kanjani ngemoto yakho.
Ngiyazi sekwande nomakhenikha abakhandela eceleni komgwaqo ikakhulukazi ngalapho kudayisa khona izinsimbi zezimoto. Lababhemu bayacutha uma bekubona uthenga okuthile njengezicathulo zokubhuleka ama brake pads noma okulungiseka kalula bacele ukukufakela.
Ngenxa yokuthi wayifunda ingosi yangesonto eledlule ngeke ngisaya ekutheni kuzodingekani ukuze ubone ukuthi ungamethemba loyo makhenikha wasemgwaqweni kodwa ngithi yena ungcono kunoshiselayo ngoba akaphethe umlilo ngezandla.
Umbono wamahazard uthi ungayihambisi imoto yakho ukuthi iyoshiselwa kulaba bantu abamisa amabhodi eceleni komgwaqo bethi siyashisela la ngoba akuphephile.
Hhayi-ke ngivumeleni ngimemezele ukuthi siwacishe lana okwamanje bese sibuyela emgwaqweni nami kukude eMdubane ngiseSikhaleni Senkosi. Masiqhubeke nokushayela ngokubuswa yiyo yonke imithetho yezokushayela ebusa leli zwe siqaphele lapho sikhanda khona ukuze sihlangane sisaphephile nezimoto zethu zisekhona empilweni.
Uma ufisa siyiqhube le ndaba ngena ekhasini lethu kuFacebook othi Igedlelalami with Sthembiso Shangase. Yimi owenu nali ikheli ngezansi hazardiso@gmail.com