Ufuna ukuthuthuka owine kwiDundee
UNESIFISO sokungenela imijaho emikhulu eNingizimu Afrika umgibeli wehhashi elidle umhlanganiso emjahweni wosuku kwiDundee July ngoMgqibelo.
UDoctor Mbatha waseUtrecht esifundeni iMajuba, obegibele ihhashi uNxakanxaka, ushaye intambo ezihambela yedwa phezu kokuba bekulindeleke ukuthi ushube lo mjaho wosuku. Uthole u-R50 000 nomgqomo wenkomishi.
Endaweni yesibili kungene uSigwebo Sentambo sigitshelwe nguPlaza, wahlomula ngo-R30 000.
Endaweni yesithathu kungene uComputer obegitshelwe nguLungani, wathola u-R20 000.
“Ngijabule kakhulu ngokuwina lo mjaho. Ngibone ngoLwesine ukuthi singawuwina umjaho sengibona ukuthi ihhashi lami lisesimeni esihle. Kodwa benginalo uvalo ngesikhathi uqala ngokuba khona kukaSigwebo kodwa benginalo ithemba ngoba sengake ngamshiya,” kusho uMbatha.
“Ngifisa ukuthuthuka ekugibeleni amahhashi, ngingenele imijaho emikhulu. Nangonyaka ozayo ngiyazi ukuthi ngizowina futhi.”
Ngaphandle komoya nothuli obekuphazamisa ababukeli bomjaho kodwa izinga belicokeme kakhulu nesasasa likhule kakhulu kubantu abawuhambelayo. Ingqephu ibidida unwabu, nokho amaqhawe eningi kade kuyizinjomane abebebonakala bezingunga, beshutha nazo emuva kokudla umhlanganiso.
UNgqongqoshe wezeMidlalo KwaZulu-Natal, uNkk Bongi Sithole-Moloi unxuse izinkampani ukuthi zikhuthale ukuxhasa imijaho ukuze imiklomelo izoba mikhulu.
Umjaho owandulela owokugcina ubuxhaswe yiThala Bank. Owosuku ubuxhaswe yinkampani yabangcwabi i-Amathole Funeral Services.
“Sizocela ngisho uNdunankulu ukuthi awuthathe omunye wemijaho awuxhase, ubizwe ngaye ukuze imiklomelo izoba ngcono. Sicela izinkampani zisondele ukuze umjaho uzokhula,” kusho uNkk Moloi.
“Nezinkampani ezifana neThala njengebhange esilaziyo ukuthi lixhasa abantu bakithi sizocela ukuthi liwunyuse umklomelo ngokuzayo. Ngaphandle kwalokho,
Wsiyafezeka isifiso sethu sokuhlomula komphakathi ngakwezomnotho.”
IMeya yaseNdumeni uMnuz Sboniso Mbatha, ithe amahhashi abesesimeni esihle futhi lo mjaho usho lukhulu kubona.
“Siyafisa ukuthi eminyakeni ezayo lo mjaho ube usumkhulu futhi sinesifiso sokwakha indawo ezothuthukisa amakhono abagibeli bamahhashi nawo uqobo ukuze ube sezingeni eliphezulu,” kusho uMbatha. “Umnotho uyakhula ngalesi sikhathi njengoba amabhizinisi amaningi ezuza ngezivakashi.”
S