Ixakile eyaseMzimkhulu
‘UDLWENGULE’ INDODAKAZI YAKHE ONCISHWA UCANSI:
Nonhlanhla Ntshangase: Ngaphelelwa amazwi... Akabhadle ejele, kuze kube isifundo nakwabasacabanga ukugila lo mhlola. Uma nginqaba nocansi ngezizathu zami, sekuzoqhoqhobalwa ingane yami?Naku sivelelwa bo!
Njabulo Njivah Nkosi: Manje uma uncishwa ucansi kumele udlwengule umntanakho? Kungani engahambanga wayojola ngaphandle okungcono noma uma ebona ukuthi akaneliseki la akhona ashiye ayozama la azothola khona?
Dumisani Mthethwa: Uhlasele umoya omubi kithina madoda, ngabe kwenzenjani. Uthi uyezwa sekudlwengulwe ugogo, uthi uyezwa ingane, uthi ufunda iphepha kutholakale owesifazane enqunyiwe. Kanti kwenzenjani, ungasikhokha kanjani isibhamu usikhokhela ingane yakho?
USOLA USHINTSHO NGOKUBHACAZA KWE-BUCS:
Bonga Thusini: Kodwa usafika futhi isizini yakhe yokuqala. Ningaqala nimehlulele uma sekuphele isizini ka-2017/2018 futhi yilapho nizombona khona ukuthi ngabe kukhona angakwenzela iPirates. Daluxolo Sokhulu: Nibhacaza ngamabomu kanti? Awunamahloni.
Nosisa Zikhali: Ngiyafisa ukwazi ukuthi umqeqeshi udinga isikhathi esingakanani ukuze enelise abalandeli.
UBHODLA UMLILO NGEZINSOLO UMBULI:
Khuh Baba KaKwah Mgabhi: Ngibhodla umlilo, ngiyakhala, ngiyalila, nithi nina nizolila. Ngibhodla umlilo, ngikhala ubumaye maye. Ngithi maye kuwe mbhali...Ngithi maaaaaaaaye!
Sabelo Sibisi: Ngakhuza egijima nomfelokazi wathi uyasiza. Kunjani uma kunje namhlanje, baduduza abafelokazi. Cuppuccino Sjekula: Le nsizwa ngabe nayo iyakhwabanisa?
NGAPHAMBI kosuku adutshulwe ngalo owake waba nguNobhala-jikelele we-ANCYL manje oseyikhansela le-ANC eMzimkhulu, uMnuz Sindiso Magaqa, ukhale ngeBMW ezame ukumkhipha emgwaqweni. Lokhu kushiwo ngumngani kaMagaqa ophinde akhulumele umndeni wakhe uMnuz Les Stuta izolo. UMagaqa udutshulwe ngoLwesine ntambama ngesikhathi ehamba namanye amakhansela amabili.
UStuta uthe useke wamvakashela uMagaqa esibhedlela wathola ukuthi usesesimeni esibucayi kodwa akusafani.
UNobhala we-ANC eHarry Gwala, uNkk Sindi Msomi, uthe abahlaseli kuthiwa bebehamba ngeMercedes Benz emhlophe wengeza ngokuthi uyasola ukuthi neBMW iyabandakanyeka kulesi sehlakalo.
“Amanye amakhansela adutshuliwe asesibhedlela athe ngesikhathi epaka imoto yawo, abone iBMW ebomvu esuke yahamba besanda kuma,” kusho uNkk Msomi.
Uthe kungakapholi maseko kuqhamuke iMercedez abahlaseli babe sebeqala bedubula bebhekise emotweni ebihamba amakhansela.
UMzimkhulu ukhungethwe yisihlava sokubulawa kwabantu.
USomlomo kuMasipala iGreater Kokstad, uMnuz Zolani Mhlongo, ophinde abe yiPhini likaSihlalo we-ANC esifundeni iHarry Gwala, kuthiwa naye usatshisiwe ngoMgqibelo ebusuku.
UStuta uthe ngoLwesibili uMagaqa wamtshela ukuthi iBMW izame ukumkhipha emgwaqweni kwaqhamuka enye imoto yama phambi kwakhe.
“Emasontweni ambalwa edlule, ubehambele omunye umcimbi okuthe uma ema ephuma emotweni yakhe kwaqhamuka enye imoto yama phambi kwakhe,” kusho uStuta.
Uthe abantu abadubule uMagaqa namanye amakhansela angoNsiki Mafa noJabu Msiya bebevele bebalandela besuka kubo.
“Bebefike lapha ekhaya bezobhonga emswaneni njengoba kunesifo emndenini,” kusho uStuta.
UStuta uthe abahlaseli bebehamba ngemoto engenazo izinombolo nokuyinto eyinkinga endaweni yabo.
“Kunezimoto eziningi ezizulazula endaweni ezingenazo izinombolo. Leyo nto iyasikhathaza ikakhulukazi njengoba sisibi isimo sezepolitiki,” kusho uStuta.
Uthe abakwazi ukusho ukuthi lokhu kuhlasela kuhlobene yini nombango oqhubeka esifundeni sabo.
Kuthiwa kunezingqwembe ezisabalele ezithi uMagaqa kumele akhethelwe esikhundleni sokuba yiPhini likaNobhala esifundeni njengoba kuzoba nengqunggquthela yokukhetha ubuholi.
UStuta ubhekwe esikhundleni sokuba nguMgcinimafa.
UMhlongo uthe usongelwa ngokubulawa wengeza ngokuthi kukhona nabantu abalandela izingane zakhe.
“Isimo sishubile, sibona le nto izosibuyisela emuva odlameni,” kusho uMhlongo.
Uthe uyasola ukuthi ababulali bebefuna ukubulala yena ngoMgqibelo kodwa baphazanyiswa yizinja zakhe.
“Ngifike ekhaya ebusuku ngoMgqibelo. Kuthe ngisanda kungena ngezwa izinja zikhonkotha eduze kwewindi lapho ngilala khona. Angizange ngiphume. Ekuseni ngibe sengithola izinhlamvu ezingu 24, ze-R5 ezingasebenzile zikuveranda,” kusho uMhlongo.
Okhulumela amaphoyisa KwaZulu-Natal, uColonel Thembeka Mbhele, uthe kutholakale izinhlamvu ze-R1 emzini kaSomlomo.
UNkk Msomi neMeya yaseMzimkhulu uMnuz Mphuthumi Mpabanga bathi nabo basongelwa ngokubulawa.
“Ngesonto eledlule ngithole ucingo enombolweni engingayazi oluthe ngicabanga ukuthi ngihlakaniphile bazongibamba,” kusho uNkk Msomi.