Kunxuswe osomatekisi ngezimvume
USIHLALO weSantaco KwaZulu-Natal uMnuz Boy Zondi udonse osomatekisi bakulesi sifundazwe ngendlebe wathi abayolanda izimvume zabo zokusebenza esikhungweni esikhipha izimvume.
UZondi uthe osomatekisi baseGauteng nezinye izifundazwe banenkinga yokuthi bafaka izicelo zezimvume kodwa zingabuyi izimpendulo.
“KwaZulu-Natal sinenkinga ehlukile, abantu bafike bafake izicelo zamaphemithi ebhodini (esikhungweni) kuthi uma seziphasisiwe bangazilandi.
Kuyimanje ibhodi lihleli nenqwaba yamaphemithi angalandiwe. Asifuni ukuthi uma abantu baseGauteng bekhala ngokuthi abawatholi amaphemithi nathi sithole abanikazi bomsebenzi KwaZulu-Natal bekhala esifanayo. Thina size salwa ukuze izimvume zitholakale, kubuhlungu uma zingasalandwa ngoba uhulumeni uzosithatha ngenye indlela. Sicela abanikazi bomsebenzi balande amaphemithi abo,” kusho uZondi.
Kuzokhumbuleka ukuthi ngonyaka odlule osomatekisi bamise umsebenzi izikhawu ezimbili KwaZulu-Natal emuva kokuboshwa kwezimoto ezisebenza ngaphandle kwezimvume.
UNgqongqoshe wezokuThutha KwaZuluNatal ngaleso sikhathi uMnuz Willies Mchunu wabavalela emhlanganweni kwaze kwaba yihora lesishiyagalolunye ebusuku. Kulowo mhlangano kwavunyelwana ngokuthi osihlalo bezifunda ezihlukahlukene bazoxoxisana namalungu abo afake izicelo zezimvume bese bezilanda uma seziphasile ukuze kugwenywe ukusebenza kwamatekisi angenazo izimvume.
Uthe akusadingeki ukuthi izimvume zilandwe esikhungweni esiseMgungundlovu ngoba uhulumeni uzakhile koMnambithi nezinye izingxenye zesifundazwe.
Mayelana nokhukhulelangoqo wemashi obekufanele ibe ngesonto eledlule, uZondi uthe banqume ukuthi bayimise emuva kokuxoxisana noNgqongqoshe wezokuThutha kuzwelonke uMnuz Joe Maswanganyi obanxuse ukuthi balethe zonke izikhalo zabo kuye.
“Ziyaqhubeka izingxoxo phakathi kwemboni noNgqongqoshe (Maswanganyi) ngezinkinga esibhekene nazo siyimboni. Eqhulwini lazo wukuthi sifuna ukuxhaswa njengoba kwenzeka kwabamabhasi, sifuna ukuthola izimvume zokusebenza uma sifake izicelo. Sifuna izinkampani ezidayisa izimoto zingasifuni inzalo emba eqolo. Siyathemba ukuthi konke kuzohamba kahle ngoba ungqongqoshe usukumele phezulu,” kusho uZondi.