Isicelo kowokungenisa imali kwiKZNBDS
USOLWAZI Bonke Dumisa (osesithombeni) oyilungu lesigungu esiphezulu esiphethe inhlangano esiza umphakathi iKwaZulu-Natal Blind and Deaf Society (KZNBDS) unxuse abantu ukuthi bangene bajule emaphaketheni abo balekelele le nhlangano ehlomisa abangezwa nabangaboni ngamakhono okuziphilisa.
Ekhuluma emcimbini wokungenisa imali kwi-KZNBDS, uDumisa uthe le nhlangano ayidingi imali kuphela kodwa idinga abantu bayeseke nangamakhono abanawo.
“Ngacelwa ukuthi ngibe yi-Trustee ye-KZNBDS eminyakeni engu-10 edlule ngasheshe ngabatshela ukuthi ngeke ngikwazi ngoba anginamali. Kwathi sebengichazele ukuthi kubaluleke kanjani ukusebenzela umphakathi nomsebenzi omuhle abawenzayo ngakhetha ukuba yingxenye yabo. Ukuba yingxenye ye-KZNBDS kusho ukuthi sisebenza ngaphandle kokulindela inkokhelo futhi siyanikela nganoma yini esinayo,” kusho uDumisa.
Uthe banesabelomali esingaphezulu kancane kukaR10million kanti babhekele abantu abangaphezu kuka-3 000 ngezinsiza ezihlukahlukene.
“Ukuba yinhlangano esiza umphakathi kusho ukuthi silinda ukunikelelwa ngabantu nezinhlangano ezihlukahlukene. Ingqinamba esinayo njengamanje wukuthi yize sisiza abantu abavela kuyo yonke imiphakathi kodwa abantu abanikelayo kuseyilabo ababenikela ngisho ngesikhathi sasingasizi wonke umuntu. Siyazama ukuheha abantu abasha kodwa abezi njalo ukuzosisiza. Uma umuntu enikele kulo nyaka akabuyi ngonyaka ozayo,” kusho uDumisa.
Uthe yize sezikhona izigwili kuzo zonke izinhlanga zakuleli kodwa akuzona zonke ezinikelayo.
“Ngiyacela kinina enizosiseka namhlanje ukuthi nishumayele ivangeli lokunikela ngoba kufikisela amahloni ukubona abantu abanemali beshutha namabhodlela otshwala obubiza o-R2 700 ababuthenga kalula kodwa babe nenkinga uma sibacela ukuthi abathenge itafula elibiza u-R10 000 ukuze sifake imali esikhwameni esisiza umphakathi. Ukunikela kwiKZNBDS kusho ukuthi uzosiza abantu babe nekusasa eliqhakazile,” kusho uDumisa.
Uthe umengameli we-KZNBDS, iJaji uZak Yacoob, wasizwa yile nhlangano.
Abaculi abadumile oRay Charles, Stevie Wonder, Babsie Mlangeni, Advocate Steve Teboho Kekana, umculi wowokholo uSgwili nomlingisi weSibaya uZakithi bonke basizwa ngabantu abathile ukuze bafike kuleli zinga abakulona.
“Ngiyacela sinikelele iKZNBDS, sicele nabaqashi bethu ukuthi baqashe abaphila nokukhubazeka okungenani balandele umthetho i-Employment Equity Act othi okungenani u-2% wabasebenzi makube ngabanokukhubazeka,” kusho uDumisa.