Kulimale unogada nomthengi eCambridge
KUDUTSHULWE unogada nekhasimende kubanjwa inkunzi eCambridge, KwaMashu, ngoMgqibelo.
Kuthiwa unogada obehamba ngemoto ebizolanda imali kulesi sitolo udutshulwe ephuma kuso esephindela emotweni.
Ngesikhathi edutshulwa ubaleke waphindela esitolo, wahlangabezana nabanye okusolwa ukuthi bebehambisana nalaba abamdubule ngesikhathi engaphandle ebebengaphakathi esitolo bezenza abantu abazothenga. Bavulele ngenhlamvu beqondise kuye baqede bathatha ibhokisi lemali abeliphethe. Kudubuleke nomthengi esitolo.
Okhulumela amaphoyisa KwaZulu-Natal, uCol Lt Thembeka Mbhele, uthe amaphoyisa aphenya icala lokubamba inkunzi kuhlonyiwe.
“Ngokuthola kwethu akwaziwa ukuthi yimalini entshontshiwe, amaphoyisa asaphenya. Bobabili unogada nomthengi basesibhedlela, unogada usesimeni esibucayi,” kusho uCol Lt Mbhele.
Kwesinye isigameko, kuboshwe abane abasolwa ngokuphanga igaraji likaphethroli eWasbank bezenza abantu abazothenga uphethroli, ngoLwesine.
Abasolwa abaneminyaka ephakathi kuka-25 no-30 babanjwe kungakapheli nehora bebambe inkunzi egaraji likaphethroli bathatha imali .
Kuthiwa bafike egaraji sekuzoshaya u-12 ebusuku ngoLwesine, behamba ngeVW Polo. Obeshayela wacela ukufakelwa uphethroli.
Umsebenzi wasegaraji wenze njengoba eceliwe, kuthe sekufanele umshayeli akhokhe wadonsa isibhamu wamphoqa ukuthi akhiphe imali lapho igcinwa khona. Abehamba nabo baphume emotweni babopha umsebenzi obebafakela uphethroli nomunye obekhona egaraji ngezintambo zikagesi.
Bathathe imali okungaziwa ukuthi yimalini maqede bangena kwenye imoto ebizobalanda babaleka.
Amaphoyisa aseWasbank abikelwe ngalesi sehlakalo. Kuthe esaphuthuma endaweni yesehlakalo ayimisa imoto ebihamba abasolwa.
Okhulumela amaphoyisa uCol Lt Thembeka Mbhele, uthe kutholakale i-9mm pistol, isibhamu esiyithoyizi nemali okusolwa ukuthi yiyo entshontshwe egaraji.
UKhomishana wamaphoyisa waKwaZuluNatal osabambile uMajor General Bheki Langa, uncome amaphoyisa ngokubopha abasolwa ngobugebengu ngemuva kwesikhathi kwesikhashana kwenzeke ubugebengu.
“Isibhamu esitholakele sizohanjiswa ophikweni olufanele siyohlolwa ukuthi asikaze sisetshenziswe kwezinye izigameko zobugebengu esifundazweni. Kusazocutshungulwa ukuthi abasolwa abalona yini iqembu lezigelekeqe ezibamba inkunzi emabhizinisini,” kusho uCol Lt Mbhele.
Laba basolwa okuthiwa badabuka eMsinga bazovela enkantolo yemantshi eGlencoe namhlanje.