Unqobe isicoco sesithathu uMontjane
INTOKAZI yakuleli ezihola phambili kwiwheelchair tennis, uKgothatso Montjane, ufakazele ukuthi kungani engomunye wabahlonishwayo kuleli nasemhlabeni ngesikhathi enqoba isicoco sakhe sesithathu seSwiss Open.
UMontjane (31) ubengagayelwe mphako ngesikhathi ebhuquzisa uKatharina Kruger waseGermany kowamanqamu eGeneva, eSwitzerland, ngoMgqibelo.
Lo mdlali okleliswe endaweni yesishiyagalombili emhlabeni uke wasinqoba lesi sicoco ngo-2013 no-2015 njengoba esekuphinda enqoba kuKruger ngo 6-2, 6-3.
Ngemuva kokudla umhlanganiso uMontjane odabuka eLimpopo ubonge umndeni nabangani ngokuhlezi bemeseka.
“Ngijabule kakhulu ngendlela engidlale ngayo, indlela okwenzeke ngayo ayikholakali. Yonke into imane yahlangana engathi kwenzeka ngomlingo. Isonto lonke lihambe kahle, ngithemba ukuthi ngizoqhubeka nokwenza kangcono nakweminye imiqhudelwano elandelayo yase-Europe.
“Ngesonto eledlule nginqoe iJoburg Open khona manje sengithatha iSwiss Open, kumnandi ukuqeda ungumnqobi. Ukusebenza kwami ngokuzikhandla enkundleni nokwesekwa umndeni wami nabangani kuyasiza ekutheni usuku nokusuku ngihlezi ngiziphusha ukwenza okungcono,” kusho uMontjane esitatimendeni seTennis South Africa.
Yize kumhambele kahle edlala yedwa kodwa benophathina wakhe uMacarena Cabrillana waseChile bahlulwe kowamanqamu uCharlotte Famin waseFance noMichaela Spaanstra waseNetherlands ngo 4-6, 2-6.
Kwabesilisa u-Evans Maripa uhlulwe kweyandulela owamanqamu.
UMontjane noMaripa sebezodlulela eBerlin lapho beyoyibamba kwiGerman Open ngoJulayi 19-23.
Khonamanjalo, uGarbine Muguruza waseSpain uhlule uVenus Williams ngo 7-5, 6-0 kowamanqamu abesifazane eWimbledon.