Ithemba leKZN eMdantsane likwabawu-27
UMENGAMELI weKwaZulu-Natal Open Style Boxing Federation, uSandile Sibisi, akafuni ukucindeza abashayisibhakela abasha ngokuthi bamele isifundazwe emiqhudelwaneni kazwelonke.
IKZN izoqhuthana amakhilane nezinye izifundazwe kuma-SA Champs azoba seMdantsane e-East London kuleli sonto. Kulo mqhudelwano kuzoqokwa iqembu elizomela iNingizimu Afrika kuma-World Champs azoba seGermany ngoOkthoba. Iqembu leKZN lishaya ngenqwaba yamabhokisa amasha angase abhekane nobunzima. Iningi labashayisibhakela abebekade bejwayele ukutholela iKZN izindondo selinyukele esigabeni esikhokhelayo. Bawu-27 (abafana bawu-17 namantombazane awu-10) abashayisibhakela abasekhempini eDundee abathwele amathemba eKZN emqhudelwani oseMdantsane okulindeleke ukuthi bazifake eqenjini labawu-15 (abafana abangu-10 namantombazane ayisihlanu) abazoya eGermany. Kwabanamava kukhona uBathabile Ziqubu waseMnambithi noNomusa Ngema waKwaMashu, Siphelele Mathe, noMxolisi Zuma ongumpetha kuma-Zone 4.
“Leli yiqembu elisha futhi asifuni ukulicindeza kodwa liseqophelweni eliphezulu. Nginalo ithemba lokuthi okungenani izindondo zegolide eziyisishiyagalombili sizozithola,” kusho uSibisi.
“Ngicabanga ukuthi umbango phakathi kwethu ne-Eastern Cape usazoba khona njengokwejwayelekile nakuba yona ikade iqalile ukuba sekhempini.”
Phezu kokuba iqembu lesizwe belikade liqeqeshwa nguNkosinathi Hlatshwayo waseDundee ubezithola sekufanele athembele kubashayisibhakela bakwezinye izifundazwe ngenxa yokuthi abaseKZN bayasala uma sekuhlungwa. UHlatshwayo uqeqeshe iqembu lesizwe iminyaka engaphezu kwewu-10. Kubashayisibhakela abadlule ezandleni zakhe kukhona uThulani “Tulz” Mbenge wase-Eastern Cape osanda kuwina ibhande le-SA welterweight ehlula umpetha uSean Ness, Ayabonga Sonjica nabanye. Kuzoqokwa umqeqeshi omusha weqembu lesizwe maduzane.
“Inhloso yethu wukuba nabashayisibhakela abaningi esikwatini sethu. Eminyakeni edlule kade kukhona o-Irvin Buhlalu abaye ngisho kuma-Olympics nokusho ukuthi singayenza le nto. UMnyango weZemidlalo eKZN usihlinzeke ngezinto esizidingayo ukuthuthukisa isibhakela nasezindaweni ebezingenalutho. Sekusezandleni zethu ukukhiqiza amabhokisa azokwenza umsebenzi.”