UMkhalele unethemba ngejezi elisha leBucs
KUNGUMSEBENZI wabo bonke abazibiza ngabaphathi be-Orlando Pirates ukuqinisekisa ukuthi kungena kugxile emiqondweni yabadlali ukuthi libaluleke kangakanani ijezi abazobe begijima ngalo ngesizini ezayo ukugwema ihlazo elenzeke ngesizini edlule ligubha iminyaka ewu-80.
Lawa ngamazwi kaqolothakamango wePirates, uHelman “Midnight Express” Mkhalele, awasho izolo emini eqeda ukusiza iBucs yethula umsiko wayo omusha we-Adidas abazogijima ngawo kule sizini ezoqala.
Ekuqaleni kwesizini edlule iBucs ithule ijezi elinombala oluhlaza ukugubha iminyaka ewu-80 kwasukungulwa iqembu. Kodwa igcine ingabangakhona imibhiyozo iqembu lihluleka wukunqoba ngisho esokubika isicoco.
Phambilini Ezimnyama zike zashaya nangejezi elibomvu kodwa kulokhu zibuyele emibaleni ezaziwa ngayo, omnyama nomhlophe.
Okusheshe kwacaca ngesikhathi livela okokuqala kubantu ijezi elisha wukunengeka kwabanye abalandeli abegxeka iqembu nabakwa-Adidas ngokungazihluphi ngokucabanga. Abanye bebekusola ngokubuyisa ijezi elidala iminyaka ibe iya phambili.
UMkhalele ukucacisile ukuthi umsiko wenziwe ngabomu ukuze ulandele esitayeleni sakudala sezikhathi zempumelelo kuBucs, ukuze kukhunjuzwe abadlali ngomlando wePirates wokugebhula izizwe idla izicoco.
“Ngonyaka engifike ngawo kwiPirates (1993) ijezi elifana naleli belisetshenziswa yiqembu thina esingene esikhundleni salo. Noma kungelula ukuthi ngikhumbule amagama kodwa leli yijezi lomlando kwiPirates futhi kuyangicacela ukuthi kungani ilibuyisile. IPirates ibe nesizini embi. Okusemqoka manje wukusebenza imiqondo yabadlali. Ngiyabona ukuthi sebeqalile ngejezi. Kungumsebenzi wabo bonke abazibiza ngabaphathi ukuthi baxukuze imiqondo yabadlali ngesikhathi esifanayo babakhumbuze umlando iqembu eliwuqophe lidlubhe umfaniswano othi awufane nalo.”
Ngaphandle kwabafanise ijezi neleMoroka Swallows neLiverpool akudala, bakhona abafana noMkhalele abalibona lilihle.
ULord Steppington@Mvano kwi-Twitter, uthe: “Siyabonga ngokuhlukana nombala oluhlaza nobomvu. Singezimnyama ngenkani thina. Ningalenzi iphutha.”
NjengeleKaizer Chiefs ethule elayo ngesonto eledlule, kulindeleke ukuthi umswenko omusha wePirates ubonakale okokuqala kwiCarling Black Label Cup eFNB Stadium ngoJulayi 29.