Ugeqe amagula efakaza kolwaseGlebe
UKUDAYISWA kwemibhede nokufuna amandla okuphatha yikhona okungumsuka wokubulawa kwabantu ehostela iGlebelands eMlaza.
Lokhu kuvezwe ngowayesekomitini lezokuphepha eGlebe ongasahlali khona ngenxa yovalo.
Ufakazi, ongeke adalulwe njengokwesinqumo sekhomishini ephenya ngokubulawa kosopolitiki, uthe usathuka izanya yize engasahlali ehostela.
“Siyesaba, uhamba ujeqeza ngoba ungabulawa noma nini. Ngisho ungasahlali kule ndawo uyalandelwa. Baningi abanye abafowethu ababulawa phambi kwethu,” kusho ufakazi.
Ubefakaza phambi kwekhomishini ka-Advocate Marumo Moerane enezigcawu eThekwini kuleli sonto.
Ufakazi oneminyaka engu-45, uthe wafika ehostela ngo-1989.
“Ngafika ngizofuna umsebenzi, isimo sasingenje. Ukubulawa kwabantu ngenxa yemibhede kuqale ngo-2013. Imibhede ingumsuka wokubulawa kwabantu ngoba uma kukhona ophumile endlini esethathe impeshenini umbhede udayiswa ngoR1000. Izinkabi ke zangena ngenxeba lokuthi ziyahlomula ekudayisweni kwemibhede,” kusho ufakazi.
Uthe kunabaholi be-ANC ababengahambisani noxolo ehostela ngoba behlomula.
“Ngibalekile ngonyaka odlule ngayohlala kwenye indawo ngoba nami bese ngizobulawa. Kwathi ngelinye ilanga ngiya emsebenzini ngashayelwa ngenye insizwa ingazisa ukuthi angingabe ngisaya kogibela eMega City ngoba kukhona ababengicuthele. Ngadlula ngetekisi ngabona kume abafana ababili befake okufihla ubuso. Thina esasisekomitini besidutshulwa ngoba kukhona omunye uzakwethu owadutshulwa egeza wasinda,” kusho ufakazi.
Uthe oshoyo ukuthi ubani ozobulawa yiphoyisa elalihlala ehostela.
“Uma lingakasho ukuthi ubani akabulawe ubengabulawa. Beliqoqa imali kuthiwe kuzothengwa izibhamu. Kwaqoqwa u-R9000 kwathengwa isibhamu esasetshenziswa kudutshulwa eBlock R,” kusho ufakazi.
UNgqongqoshe wezokuPhepha koMphakathi KwaZulu-Natal, uMnuz Mxolisi Kaunda, uthe kunamaphoyisa amabili asesusiwe eGlebe asolwa ngokugwazisa abantu ukuze kusulwe amacala. Uthe azobhekana nengalo yomthetho. akazi mine endlini ngayinye. EGlebe kunama-block angaphezulu kuka70, ngakho inkulu imali eqoqwayo ukuze kukhokhelwe izinkabi. Imali iqoqelwa ukuthi kuthengwe izibhamu nezinhlamvu kuthiwe kuvikelwa abahlali.”
Ohola ubufakazi u-Advocate Bheki Manyathi ubuze uNksz Burger nofakazi ukuthi ngabe izinkabi eziseGlebe zisetshenziswa kusona sonke yini isifundazwe.
“Abanye ofakazi abane abafakaza ngeGlebe bathi lezi zinkabi zisebenza isifundazwe sonke, ngabe lokhu kuyiqiniso? Ngabe ukubulawa kwabantu kuhlobene yini nezombusazwe, amandla okulawula indawo nokuzicebisa?” kubuza uManyathi.
UNksz Burger nofakazi bavumile ukuthi kunenhlese yezepolitiki odabeni lwaseGlebe nokuthi izinkabi zisuke zifuna ukuzicebisa. “Ihostela liyisizinda se-ANC ngakho awukho umbango wokuhlukana kwezepolitiki. Akufani nakwamanye amahostela ahlukene kakhulu ngokwamaqembu. Lapha kubulalana abantu be-ANC.”
Usole umasipala namaphoyisa ngokuhluleka wukulungisa isimo
Uchithe isiphakamiso sokuthi kulethwe amasosha azoqapha wathi lokhu kuzokwenza umphakathi uhlale ngokwesaba.
“Into engasiza ngukuthi kuhlakazwe ubuholi begatsha le-ANC kuxoshwe nekhansela ngoba abantu kade babekhala ngalo. Akubuyekezwe namathenda nalabo abawatholayo ngoba indaba yaseGlebe ithinta namathenda ngoba kukhona abadlayo ngokungabikhona kozinzo ehostela,” kuqhuba uNksz Burger.
Uthe bawu-22 000 abantu abahlala ehostela esikhundleni sabantu abawu-10 000.
“Ezindlini okumele ngabe kuhlala abantu abane, kugcina sekuhlala inqwaba yabantu kuzo. Umasipala awazi nokuthi wobani abahlala kuzo.” Uthe cishe ama-block angu-14 aphethwe yizinkabi.