Kunezinhlelo zokuthuthukisa abamatekisi emuva kwezikhalo
ZIZWAKELE izikhalo zosomatekisi abazophazanyiswa wuhlelo lwezokuthutha oludidiyelwe oluhlanganisa amabhasi anemizila yawo adume ngele-GO! Durban njengoba uMasipala weTheku ezobenzela izinhlelo ezizothuthukisa amabhizinisi abo.
Ngokwesitatimende esithunyelwe nguMasipala weTheku izolo kunezinhlelo zokuthuthukisa osomatekisi ezizoqala ngo-Okthoba okuyinyanga yezokuthutha.
Usihlalo wekomiti lezokuHlaliswa kwabantu neNgqalasizinda kuMasipala weTheku, uMnuz Mondli Mthembu, uthe bazothuthukisa amakhono osomatekisi ukuze kuthi uma kuqala uhlelo lwe-GO! Durban bathole amathuba eza nalo.
Uthe osomatekisi bazosebenza noma sekukhona amabhasi e-GO! Durban ngoba bazoqeqeshwa ukuthi bathuthe umphakathi ngendlela ephephile.
IPhini leNhloko yoPhiko lwezokuThutha kuMasipala weTheku, uMnuz Mlungisi Wosiyana, lithe bazokweseka bonke ososeshini ukuze bathuthukise amakhono nebhizinisi labo.
“Ukuze umasipala usebenze kahle nomnotho uthuthuke kudingeka sibe nezokuthutha ezisezingeni eliphezulu. Sizoqeqesha abashayeli bamatekisi, abanikazi bomsebenzi ukuze basebenze ohlelweni lwezokuthutha oludidiyelwe. Uma seluqala uhlelo lwe-GO! Durban abashayeli nabanikazi bomsebenzi abanamakhono adingekayo bazothola amathuba,” kusho uWosiyana.
Uthe abashayeli kuzobhekwa ukuthi bayakwazi yini ukuphatha kahle abagibeli, abawugqomisi ngokweqile umculo, bahlanzekile, balandela imithetho yomgwaqo nokuthi bashayele ngesivinini esivumelekile.
Amatekisi kufanele abe sesimeni esifanelekile, abe nezimvume ezisesimeni esifanele.
Uthe bazoba nohlelo lokulandelela amatekisi ukuthi asebenza kanjani ukuze baqoqe ulwazi.
USihlalo weSantaco e-Inner West, okungamatekisi asebenzela iPinetown nezindawo ezakhelene nayo, uMnuz Bheki Mbambo uthe kubalulekile ukuthi umasipala uhlomise ngolwazi olufanele ukuze kuthi uma kuxoxwa nososeshini abathintekayo njengoba kuza izinhlelo ze-GO! Durban bahlomule.
Uthe izinhlelo zokuthuthukisa amakhono abashayeli nabanikazi bemboni ziyadingeka futhi kumele kuqeqeshwe namakomiti ososeshini abathintekayo.
Uphinde wathi kubalulekile ukuthi ososeshini abathintekayo bazikhulumele ukuze imboni izothatha izinqumo ezifanele.
Ngenyanga edlule osomatekisi baseClermont/ KwaDabeka Taxi Association nabasePinetown Taxi Association bebehlangene ukudingida izinhlelo ze-GO! Durban nokuthi bazobhekana kanjani nezinguquko embonini yezokuthutha.
Baphinde bahlangana naboPhiko lwezokuThutha kuMasipala weTheku ukubanika uhlu lwabo lwezikhalo.