‘Ukushiya kwezikhulu akuzophazamisa’
UKUSHIYA kwezikhulu eziphezulu kuMasipala weTheku ngeke kuphazamise ukuhanjiswa kwezidingo kubantu, usho kanje uNkk Zandile Gumede oyimeya.
Iphendula imibuzo yeSolezwe ebibheka ukushiya kwezikhulu ezine kuMasipala weTheku, imeya ithe akukho okuzophazamiseka emkhandlwini futhi abantu bazozithola izidingo.
“UMasipala weTheku awuzixoxi izindaba zabasebenzi bawo nezinye izinhlaka. Kunomthetho obhekelele ukuziphatha kwabasebenzi nowokubaqondisa ubugwegwe. Ngithanda ukuqinisekisa abantu baseThekwini ukuthi ukusula kwezikhulu nokuxoshwa kwezinye ngeke kuphazamise ukuthunyelwa kwezidingo. I-DA izama ukususa umsindo kodwa ngeke iphumelele ngoba umkhandlu usebenza kahle ngaphansi kwemenenja uMnuz Sipho Nzuza,” kusho uNkk Gumede esitatimendeni.
Umholi weDA KwaZulu-Natal, uMnuz Zwakele Mncwango usole izikhulu zikaMasipala weTheku ngokusebenzisa ikhefu ukususa bonke ababezwelana nemeya yakudala uMnuz James Nxumalo nokuphazamisa uzinzo kulo masipala.
Abophiko lwezokuxhumana kuMasipala weTheku bathe uma kunezindaba ezithinta abasebenzi zixoxwa nabo ngqo ukuze kulandelwe umthetho weLabour Relations.
Izolo Isolezwe libike ngezinhlelo zokukhokhela umphathi wamaPhoyisa kaMasipala uMnuz Eugene Nzama imali engaphezu kuka-R10million uma ethatha umhlalaphansi ngaphambi kwesikhathi.
Isolezwe lithole ukuthi abameli basadingida ukuthi uNzama ufanelwe yisamba esingakanani uma ethatha umhlalaphansi singakafiki isikhathi sakhe sikadekle.
Ngaphandle kukaNzama kumiswe iNhloko yezamaPaki, nezokuNgcebeleka uMnuz Thembinkosi Ngcobo oselokhu waba sobishini emuva kokubhuntsha kwengqungquthela yokuhlanganisa zonke izinhlanga zakuleli okwakuzokhuluma kuyo uMengameli we-IFP inkosi Mangosuthu Buthelezi.
INhloko yoPhiko lukagesi uMnuz Sandile Maphumulo uxoshiwe, eyophiko lwezeMpilo uDkt Nomakhosi Gxagxisa nayo isamisiwe, iNhloko yoPhiko lwezomthetho uNkk Nakhana Moerane isulile.
IPhini leMenenja kaMasipala uDkt Musa Gumede lona liyagcina kule nyanga njengoba selithole amadlelo aluhlaza.
UMnuz Mdu Nkosi we-IFP uthe akulungile ukuthi kuxoxwe ngodaba lokunika uNzama izigidi zemali yabakhokhi bentela ekubeni umkhandlu usekhefini.
Uphinde wadonsa ngendlebe i-ANC ukuthi ifake ezikhundleni abantu abaneziqu zomsebenzi abawenzayo hhayi ukuthi kufakwe amaqabane ngoba uma sekungena awohlangothi oluthile amanye ayaxoshwa athe yinto eyenzekayo kuMasipala weTheku.