Bavivela umgubho ozoba seKZN
KONKE sekumi ngomumo ngamalungiselelo omgubho weminyaka emine ye-EFF ozoba seCurries Fountain eThekwini ngoMgqibelo mhla ka-29.
Ilungu le-EFF esiShayamthetho KwaZulu-Natal, uMnuz Vukani Ndlovu, izolo lifunge lagomela lathi bazoyigcwalisa inkundla njengoba belindele ukuthi amalungu abo aphume ngobuningi bawo.
“Lo mcimbi uhlelwa ezingeni likazwelonke kodwa ubuholi bukhethe ukuwuletha eThekwini ngoba kuyaziwa ukuthi liyisifunda esikhulu,” kusho uNdlovu.
Uthe akangabazi ukuthi amalungu abo aseThekwini azogcwaliswa inkundla.
“Ngifuna ukukubeka kucace ukuthi awekho amabhasi esiwaqashile azothutha amalungu angahlali eThekwini. Amalungu ethu angahlali eThekwini afuna ukuza emcimbini azozihlelela ezokuthutha,” kusho uNdlovu wengeza ngokuthi kodwa wonke umuntu wamukelekile azolalela umyalezo kaMkhuzi oMkhulu weqembu, uMnuz Julius Malema.
Ubuholi obuphezulu be-EFF buthelekile eThekwini buzoqhuba amalungiselelo omcimbi. Sebuke babonakala endaweni yobumnandi eYadini, eMlaza buzithokozisa nabantu.
UNdlovu uthe ezokuphepha zizobe ziqinile wathi akaboni ukuthi kukhona okungaphazamisa.
“Inkundla sesiyitholile konke kuhamba ngohlelo,” kusho uNdlovu.
Uthe bafuna ukuyigcwalisa iCurries Fountain njengoba begcwalise i-Orlando Stadium eGoli begubha iminyaka emithathu ngonyaka odlule.
“Umcimbi kwakungowaseGoli kodwa amalungu avela ezweni lonke ayamukelekile ukuza ezozwa umyalezo womholi,” kusho uNdlovu.
Uthe ngaphandle kokuhlela umcimbi, bamatasa bazama ukwakha izinhlaka zabo njengoba bezimisele ngokwenza kahle okhethweni luka-2019.