Usezakhele udumo ngezinkulumo ezakhayo
USEPHENDUKE isilomo kubalaleli bohlelo lwasekuseni iVuka Mzansi Breakfast Show oKhozini FM, uMfundisi Thomas Radebe (osesithombeni) ngezinkulumo zakhe ezigqugquzelayo nezibuyisa ithemba azethula kulolu hlelo ngoMsombuluko kuya kuLwesithathu.
URadebe, ophinde abe yiLife Coach, uthe ukugqugquzela abantu nokubanika ithemba ezinkingeni ababhekene nazo akwenele kodwa kumele kuhambisane nemizamo yokubalekelela ukuze bagcine bengabantu abangcono ngomuso.
“Ngisebenzisana nabaxhasi abangilekelela ezinhlelweni zokusiza umphakathi odingayo ngingagcini nje ngokukhuluma emoyeni.
“Ukutshela umuntu ukuthi uzophuma enkingeni akwanele uma ungamcebisi ngendlela yokuphuma. Kufanele sithi sigqugquzela abantu, sibuye senze neminye imizamo yokubalekelela ukuze nangomuso sikhombe into ebonakalayo esiyenzile ukushintsha impilo yabantu,” kusho uRadebe. URadebe ongaconsi phansi kubantu kulezi zinsuku usebuya okwesibili kulo msakazo njengoba eseke wenza umsebenzi ofanayo ngo2007 uhlelo lusasakazwa nguDJ Sbu. Ungowokudabuka eMatitiela kanti usezinze eDurban North lapho ehlala khona nomndeni wakhe. Ngaphandle kwezinkulumo ezakhayo uphinde abe nohlelo lapho eluleka khona abaholi aphinde avule nenkundla yokucobelelana ngolwazi phakathi kwabo, olubizwa nge-Iron Sharpens Iron. “Sengihlangane nabaholi abaningi ababambe iqhaza elikhulu emphakathini. Nabaholi bayadinga ukwelulekwa ikakhulu ngoba esikhathini esiningi bahlale benengcindezi yokuba yisibuko somphakathi,” kuchaza uRadebe. Esanyamelele oKhozini ubeqhubeka nokwethula izinkulumo ezigqugquzelayo kwiGagasi FM okuyinto ayenze iminyaka eyisithupha ohlelweni i-Alex And The Morning Crew . Ungumfundisi webandla i- Ekhaya Christian Family eliseMlaza elinamalungu angaphezu kuka-200.