Isidididi uMhlongo ekhonjwa kwiChippa
KUSUKE esinye isidididi ngokuhwebelana ngabadlali phakathi kwe-Orlando Pirates neChippa United ngemuva kokuvela kokuthi unozinti weZimnyama uBrighton Mhlongo usejoyina leli qembu laseBhayi.
Sekujwayelekile ukuthi kube nokungacaci ngabadlali abasuke besuka kwiPirates bebheke kwiChippa noma abasuka kwiChili Boys belibangise kwiBucs.
Emasontweni adlule iChippa yagcina ingazange iphawule ngodaba lukaThamsanqa Sangweni omenyezelwe yiPirates njengomdlali wayo omusha ekubeni ngoDisemba avuselela inkontileka yakhe ngeminyaka emithathu.
NgeSonto ebusuku kuvele ukuthi usihlalo weChippa United uSiviwe “Chippa” Mpengesi udalule komunye umsakazo ukuthi usehlabene ngoMhlongo obekwiPirates.
Imenenja kaMhlongo, uMike Makaab weProSport International, itshele Isolezwe izolo ekuseni ukuthi idumele ngesenzo sikaMpengesi. Ngeledlule iPirates isayinise unozinti uWayne Sandilands obegijima kwiMamelodi Sundowns.
“Ngidumele ngesenzo sikaChippa Mpengesi. Nginobudlelwano obuhle naye. Akushilo emsakazweni kungamanga. UMhlongo akakaze asayine lutho neChippa United. Kungenzeka ukuthi usevumelene (uMpengesi) nePirates kodwa umdlali akukakhulunywa naye ngezimfuno zakhe. Ngakho awukwazi-ke ukusayinisa umdlali ungakakhulumi naye ngezidingo zakhe. Njengamanje uMhlongo ungumdlali wePirates nayo ebingakaze ingitshele lutho ngalolu daba. Usihlalo wePirates u-Irvin Khoza naye nginobudlelwano obuhle naye. Ngisazobuyela kuyena angicacisele kahle ngalolu daba,” kusho uMakaab.
UMpengesi kuthiwa uphinde waveza ukuthi uMahlatse Makudubela, James Okwuosa noThembinkosi Lorch beza kwiChippa. Okunye okuvelile wukuthi uDiamond Thopola noJustice Chabalala sebezoyibamba kwiPirates.
Yize uMakaab egxeka isenzo sikaMpengesi kodwa lo sihlalo usejwayele ukuthi apotshoze izinto ngabadlali abanezinkontileka zamaqembu ethize futhi asuke ekusho kugcine kwenzekile.
Ngesizini edlule kwenzeke esifanayo uMarc van Heerden noNkosinathi Mthiyane bejoyina iPirates. Kuphinde kwaba okufanayo uMenzi Masuku esayina kwiChippa. Usanda kuveza ukuthi usayinise uKurt Lenjties nakhona bamhlaba bamhlikiza kodwa ekugcineni umdlali washo ukuthi usejoyine iChili Boys eshiya iMaritzburg United.
Imizamo yokuthola uMpengesi izolo ayiphumelelanga, ucingo lwakhe belukhala lungabanjwa. Leli phephandaba libe selithinta uLuthando Zibeko wezokuxhumana kwiChippa, wathi: “Okwamanje akukho esizokuphawula siyiChippa United ngabadlali abamataniswa nathi. Asazi futhi ukuthi iqhamuka kuphi indaba yokuthi usihlalo weqembu uke waqinisekisa ukuthi kunabadlali bePirates asebasayinisile. Umcimbi wokwethula abadlali abasha sizowenza ngo-Agasti 3. Kona ngeke sikufihle ukuthi sisezinhlelweni zokuqinisa iqembu.”
Kuthintwa uThandi Merafe wezoku-xhumana kwiBucs ukhale ngokuthi umatasa nendaba yokwethulwa kwejezi elisha leqembu.
UFloyd Mbele ongesinye sezikhulu kweZimnyama uthe ngeke akwazi ukukhuluma ngoba usemhlanganweni. UDerek Blanckensee naye osanda kuqashwa kodwa okungavezwanga ukuthi yisiphi isikhundla asiphethe, uveze ukuthi akavunyelwe ukukhuluma ngendaba yokusayiniswa kwabadlali abasha.
Khonamanjalo, adayiswe aphela amathikithi omdlalo wabakhaya weCarling Black Label Cup oqhathe iPirates neKaizer Chiefs. Umdlalo useFNB Stadium ngoJulayi 29.
Khonamanjalo, uMpengesi uvumile ukuthi abadlali abamataniswa neChippa United sebengabakhe ngesikhathi ekhuluma ohlelweni lukaVictor Molefe oKhozini FM.
Uxolisile kuMakaab ngokungamazisi ngesikhathi ngalolu daba.