URivaldo Coetzee angase angaholi
SISENGCUPHENI yokungaholi isilomo somdlali weBafana Bafana uRivaldo Coetzee ongakaze abuyele kwi-Ajax Cape Town selokhu iqale ukwenza amalungiselelo esizini entsha ka-2017/18.
Kuthiwa uCoetzee, okhala ngokuthi kunabadlali abahola imali ephindwe kabili kuneyakhe, akaneme ngemali ayiholayo kwiUrban Warriors.
UMirch d’Avry, inhloko yethimba la baqeqeshi kwi-Ajax, uthe izolo ntambama kungenzeka angaholi uCoetzee njengoba iphela inyanga ngesonto elizayo.
“IPremier Soccer League sesiyazisile ngodaba. URivaldo usanyamalele namanje. Unenkontileka yeminyaka emibili neqembu. Awukwazi-ke ukuvele unyamalale ekubeni unenkontileka neqembu. Noma kungathiwa kukhona into ongeneme ngayo awukwazi ukuvele unyamalale. Ukunyamalala akuyisombululi inkinga. Njengoba umdlali engekho ejimini angikholwa wukuthi ulindele ukuhola ekupheleni kwenyanga. Phela uma ungezi emsebenzi awukwazi ukulindela ukuthi uhole. Inkontileka yakhe imphoqa ukuthi abe mdibi munye neqembu njengabanye abadlali abanezinkontileka,” kusho uD’Avry.
Amaqembu okuvela ukuthi afuna uCoetzee yi-Orlando Pirates neMamelodi Sundowns.
“Selokhu ngifikile lapha eqenjini alikho iqembu eselike lasibhalela isicelo lithi linentshisekelo yokusayinisa uRivaldo. Ukuthatha ucingo ufonele umuntu umbuza ngomdlali akusho ukuthi usufake isicelo ngoba ngingafonelwa ngabantu abawu-20 bengibuza ngomdlali. Isicelo kuba yisicelo uma sekunento ebhalwe phansi. Mina ngidabukela yena umdlali ngoba unenkontileka yeminyaka emibili neqembu. Usemncane futhi unekhono eliyisimanga. Umbuzo omkhulu ngowokuthi ngabe uzimisele ngokuhlala iminyaka emibili engalidlali ibhola? Thina asinankinga nokuhlala naye phansi sibhunge ikusasa lakhe,” kusho uD’Avry.
Uthe uma umdlali esebuya uzoqondiswa yiqembu izigwegwe. “Phela ukunyamalala ngaphandle kokwazisa iqembu kuyicala emsebenzini. Awucabange ukuthi bangaki abadlali abangavele bazihlalele ekhaya uma bengeneme ngezinto ezithile eqenjini ukube kuvumelekile ukwenza lokho. IProSport International, inkampani ephethe izindaba zakhe, ithe iyaseseka isinqumo somdlali.”