Bahlose ukuqhakambisa ikhono leKZN eGoli
UHLOSE ukuyoqhakambisa ikhono lesifundazwe iKwaZuluNatal emqhudelwaneni kazwelonke umqeqeshi weDurban FC, uThabani “Fish” Zondo owine umqhudelwano i-Engen U/17 Knockout Challenge.
IDurban FC ihlule iToronto Blizzards ngo 10-9 sekukhahlelwa amaphenathi emuva kokuthi umdlalo uphele zibambene ngo 0-0 ezinkundleni ezingaphandle kweMoses Mabhida Stadium, eThekwini, ngeSonto.
Bekubhekwe ukuthi izinkulisa zamaqembu adlala kuPremier Soccer League (PSL) okukhona kuwona iLamontville Golden Arrows, AmaZulu neRoyal Eagles yizona ezizodla umhlanganiso. Nokho azilibonanga elidlalayo kwagcina kugiya iDurban FC eneqembu elidlala ku-ABC Motsepe League eliqeqeshwa nguMlungisi “Professor” Ngubane.
Ngokuwina i-Engen eKZN, iDurban FC ihlabane ngesheke lika R15 000 yathola nethuba lokumela isifundazwe emqhudelwaneni kazwelonke iChamp of Champs ezoba ngo-Okthoba eNike Centre, ePimville, eGauteng, ngo-Okthoba. Lapha izobhekana namaqembu okukhona kuwona iSuperSport United, Bidvest Wits namanye.
UZondo waKwaMashu, ophinde asebenze njengephini likaNgubane eqenjini elikhulu leDurban FC, uthe bafuna ukuyokhombisa eGauteng ukuthi ikhono aligcini ezinkulisa eKZN. Ubengumqeqeshi waMaZulu ngesikhathi ewina i-Engen esifundazweni ngo-2007 nango2008.
“Ngeke sisiphoxe isifundazwe. Lapha siyokhombisa ukuthi eKZN noma ngabe iqembu liphansi kanjani kodwa abadlali abanekhono bagcwele yonke indawo. Yilokho engifuna abantu bakubone eJozi.
“Ngifuna iqembu libonwe ngoba liselincane kodwa lifuna ukudlondlobala. Ngiyawazi amaqembu aseGauteng ukuthi adlala kanjani, indlela okudlala ngayo amaqembu amakhulu iyafana nesetshenziswa ezinkulisa,” kusho uZondo.
Ngaphandle kokuwina umqhudelwano kweDurban FC, injini yaleli qembu uNtokozo Nzimande uhlabane ngomklomelo wePlayer of The Tournament nowe-Midfielder of The Tournament.
“Okusisebenzele wukuhlela kahle nokuzilungiselela ngendlela. Ngihlele kahle ngoba ngiyazi ukuthi kudingekani ukuze ngiwine lo mqhudelwano futhi nabadlali basebenze ngendlela. Kwesinye isikhathi bengibona ukuthi bayasaba ngoba iningi labo beliqala ukudlala kulo mqhudelwano kodwa bamelana nalokho,” kusho uZondo.