Nenzani mantombazane nichaza umengameli?
UMENGAMELI weCricket South Africa (CSA), uChris Nenzani, uchazekile ngokwenza kahle kweqembu lesizwe lamantombazane kwiNdebe yoMhlaba ese-England.
Iqembu lesizwe lidlulele kuma-semi final eNdebe yoMhlaba elizobhekana kuwo ne-England eqede phezulu emdlalweni wamaqoqo. AmaProteas esifazane aqede endaweni yesine eqoqweni.
Umdlalo owandulela owamanqamu unamuhla ngo-12 emini eBristol Country Ground, eBristol, e-England.
La maqembu azobe esehlangana okwesibili kulo mqhudelwano. Emidlalweni yamaqoqo i-England yaqumba phansi iNingizimu Afrika ngama-run awu-68 enkundleni efanayo.
“Kuyasijabulisa ukwenza kahle kwamantombazane kwiNdebe yoMhlaba e-England. Okuhle akwenzayo akungimangazi uma ubona indlela enza ngayo kule minyaka emibili edlule. Wonke amantombazane adlala lapha kwiNdebe yoMhlaba aziphilisa ngokudlala ikhilikithi,” kusho uNenzani.
Emidlalweni yamaqoqo i-England inqobe imidlalo eyisithupha yahlulwa kowodwa. Yahlulwa yi-India ngama-run awu-35 emdlalweni wokuqala.
“Sinethemba lokuthi kusasa (namuhla) bazozibamba ziqine uma sebebhekene ne-England. Okuhle wukuthi ingcindezi ibhekene ne-England njengeqembu elidlalela ekhaya futhi eliqede phezulu kwi-log. Ngakho ngeke sicindeze amantombazane ethu. Kungamnandi ukudlulela kowamanqamu futhi amathemba makhulu,” kusho uNenzani.
ULizelle Lee nguyena umdlali ogqamile kulo mqhudelwano. Useshaye ama-run angu-262 kumaInnings ayisithupha. Useshaye o-50 abathathu no-100 owodwa.
“Sihlalele ethembeni lokuthi abaxhasi bazofaka isandla. Sibonga kakhulu iMomentum engabaxhasi abahamba phambili eqenjini labesifazane. Umsebenzi wabo omuhle uthela izithelo manje,” kusho uNenzani.
Khonamanjalo iqembu lesizwe labesilisa lithele othulini i-England ngama-run angu-340 emdlalweni we-Test yesibili. INingizimu Afrika inqobe umdlalo wesibili kusasele usuku olulodwa njengoba izolo bekuwusuku lwesine. AmaProteas ayikhiphe yonke i-England isiyenze ama-run awu-133 ku-Innings yayo yesibili. Kweyokuqala ishaye angu-205. AmaNgisi abedinga ama-run angu-477 ukuze anqobe umdlalo. Umdlalo wesine ungoJulayi 27 e-The Oval bese kuthi owesine ube se-Old Trafford, eManchester, e-England. Njengamanje amaqembu abambene ngo 1-1.