Bazophelelwa wuxhaso abangavuselele
BANGAPHEZULU kuka200 000 abafundi abangase balahlekelwe uxhaso esikhwameni iNational Students’ Financial Aid Scheme (NSFAS) njengoba bengawasayinile amafomu ayisivumelwano sokuthi baluthole.
Kudingeka bawasayine ngokushesha amafomu ukuze bezoqhubeka nokuxhaswa.
Okhulumela lesi sikhwama uMnuz Kagisho Mamabolo, uthe uma umfundi esethole uxhaso kumele asayine ifomu eliwubufakazi bokuthi ulutholile.
Uthe lesi sikhwama sihlinzekwe ngoR15 billion kulo nyaka ukuze sixhase abafundi ngemali yokufunda, eyezindawo zokuhlala neyezincwadi.
“Ngeke sikwazi ukukhokhela abafundi uma bengawasayinanga amafomu. Yingakho sibanxusa ukuthi abaye kowasayina ezikhungweni abafunda kuzona,” kusho uMamabolo.
UMamabolo uthe yize bebakhokhela abanye babafundi imali yokubhalisa ekuqaleni konyaka kodwa uma bengawagcwalisi amafomu bangase begcine bengasalutholanga uxhaso.
Uphawule nangohlelo lokuxhasa ngqo abafundi okuke kwaba nesikhalo ngalo.
“Lolu hlelo luyasiza ngoba imali ingena kumfundi, sinqanda inkohlakalo. Imali ikhokhela zonke izidingo zomfundi, akubi nesimo lapho imali ibuyiselwa emuva amanyuvesi ngoba bengaxhaswanga abafundi,” kusho uMamabolo. Ngaphansi kwalolu hlelo abafundi banikwa imali kusetshenziswa uhlelo iBux ekhokhela indawo yokuhlala, ukudla kube nevawusha yokuthenga izincwadi. Phambilini umfundi ubefaka isicelo soxhaso esikhungweni afunda kuso bese inyuvesi idlulisela leso sicelo kwiNSFAS.
Kwenzeka lokhu nje ingqungquthela yemigomo ye-ANC ebiseGoli inqume ukuthi kumele kuqalwe imfundo yamahhala ngonyaka ozayo. IPhini likaNgqongqoshe lemfundo ephakeme uMnuz Mduduzi Manana, watshela Isolezwe ukuthi bakulungele ukuqala kwemfundo yamahhala emanyuvesi uma isikhona imali yokuxhasa.
Khonamanjalo kuyaqalwa ngo-Agasti ukufaka izicelo zokuthola uxhaso lokufunda kuNsfas kubafundi abakuGrade 12 nonyaka. Laba ngabafundi abafuna ukufunda emanyuvesi nasemakolishi kahulumeni. Ukufakwa kwezicelo zika2018 kuzovalwa ngoNovemba nonyaka, kubhaliswa kwi-website yakwaNsfas.