ICreta eyiSUV babangisana ngayo abathengi
NOMA ngingenalo ulwazi lokuthi iHyundai Creta ithengwa kangakanani ngoba kwaHyundai abazivezi izibalo kodwa kubonakala sengathi kube wumqondo omuhle ukuyethula emakethe.
ICreta yiSUV encane esembangweni wabathengi esigabeni esinezimoto ezenza kahle emakethe okukhona kuzo i-Opel Mokka, Nissan Qashqai, Mazda CX3, Mitsubishi ASX ne-Renault Kadjar.
Okungenza ngithi kubonakala engathi yenza kahle emakethe ukuthi yandile emgwaqeni.
Kunjalo nje ayibathathi abathengi beyakwabo iTucson ngoba nayo iyaqhubeka nokuthengwa ubuthaphuthaphu.
Incane kunayo ngokwesakhiwo nangenani.
Incane injalo nje kodwa ivulekile ngaphakathi. Okunye ngayo ukuthi iphakeme yase idla ngamandla njengoba ingakwazi nokudonsa umthwalo oyisisindo esingu 1 200 kg kungabi ndaba zalutho.
Ihlukene ngezinhlobo ezintathu okuyiCreta 1.6 Executive manual, Creta 1.6 Executive automatic neCreta 1.6 Executive CRDI automatic.
Ebengihamba ngayo yi-1.6 Executive CRDI automatic.
Ngaphambili ishaya ngamalambu amakhulu anamaLED kanjalo nama-fog lights, tripple stat chrome radiator grille.
Inyathela ngamasondo anamarimu angu16 inch ukuyengeza ubuhle.
Ngeke nhlobo uyididanise neTucson ngoba yona incane futhi ngathi iyisikwele.
Phezulu ishaya ngama-roof rails ukuze ukwazi ukulayisha enye impahla ngaphezulu.
Ngaphakathi ifana nezinye izimoto zakwaHyundai zakamuva ngoba ishaya ngesiteringi esinamabhathini okulawula umsindo, ukubamba ucingo uma ulixhume ngeBluetooth noma ukubheka imininingwane ngohambo lwakho, inetouchscreen engu-8 inch eveza inkombandlela nekhamera ngemuva uma uhlehla. Ikwazi ukudlala i-USB ne-AUX. Abashayeli abahlanu bangena khaxa kodwa izihlalo zakhona ngizizwe zinokuqina kancane.
Bengenza ngcono futhi nangokunciphisa umsindo wenjini ngaphakathi nomoya.
Abagibeli ngemuva bane-armrest phakathi nendawo enezikhala zokubeka izinkomishi.
Ngasenjinini ingu-1.6 litre turbodiesel edonsa ngamasondo angaphambili ngo-gearbox ozishintshayo onamagiya ayisithupha. Amandla ayo angu-94 kW netorque ka-260 Nm.
Ngebanga lika-100km bathi isebenzisa amalitha angu-7.4 futhi engikubonile kuyo wukuthi uma igcwele ithi ingahamba ibanga elingaphezulu kuka-700km.
Ngakwezokuphepha iphuma nama-airbag omshayeli nomgibeli ngaphambili kanjalo nama-curtain airbags futhi ine-Advanced Braking System (ABS) ne-Electronic Brake Distribution (EBD).
Ukwethulwa kwayo ngikubona kuzobasebenzela kwaHyundai ngoba idoba abathengi ukuthi bangene kumaSUV abo noma iphakethe lingavumi ukuthi bathenge iTucson okanye iSanta Fe. Inani Creta 1.6 Executive CRDI automatic R369 900.
Iphuma ne-warranty yeminyaka emihlanu noma ibanga lika-150 000km , roadside assistance yeminyaka emihlanu noma ibanga lika-150 000km ne-service plan yeminyaka emihlanu noma u-90 000km.