Uvuke esibhedlela umculi wodumo
YIZE eyalelwe udokotela ukuthi aphumule, kodwa uDJ Tira (osesithombeni) usethembise abalandeli bakhe ukuthi uzobe ekhona emcimbini iGumba Fest ezoba soLundi ngempelasonto.
Ukusho lokhu ngemuva kwemibiko yephephandaba langeSonto elibike ukuthi le nsizwa yaKwaHlabisa, ingeniswe esibhedlela ngemuva kokungazizwa kahle.
Leli phephandaba libike ukuthi ngemuva kokuzinikela ngemizuzu engu-67, ngoLwesibili njengoba bekuyiMandela Day, uTira ufike ekhaya waxineka.
Umthombo okhulume naleli phephandaba, uthe uTira wakhala ngokushisa, wazizwa enesiyezi beKwaMashu.
Omunye umthombo uthe wayengenalutho kodwa konke kwashintsha esikhaleni besemzini wakhe.
Uthe uTira waya ekhishini ukuyobalandela ababezokuphuza, bezwa ngomsindo omkhulu uqhamuka emnyango wasekhishini.
Uthe bamthola elele phansi bamqukula bazama ukumvusa bayomlalisa kusofa okulapho umkakhe, uGugu abona kungcono ayiswe esibhedlela.
Ekhuluma neSolezwe uTira izolo uqale wahleka wabuza ukuthi leli phephandaba liluthole ngobani lou daba njengoba elufihlile.
Ubezwakala ukuthi akaphilile njengoba ebekhulumela phansi.
Kodwa ugcine ekuvezile ukuthi ubelaliswe esibhedlela ngemuva kokungazizwa kahle.
“Udokotela ungiyalele ukuthi ngiqinise ekudleni okunemifino bese ngilandela imiyalelo angitshele yona. Ngisekhaya manje sengiphumile esibhedlela,” kusho uTira.
Uthe abantu bazombona emcimbini osoLundi.