Uphelelwe yithemba nge-ANC
OMUNYE womakadebona be-ANC uthe akayiboni iphela inkohlakalo kuleli qembu athe selizenzela okwalo hhayi okufunwa abantu elibaholayo.
UMnuz Mavuso Msimang, owake waba kuMkhonto Wesizwe, ukusho lokhu ngoMgqibelo kwethulwa ngokusemthethweni i-Active Citizens Movement (ACM) eThekwini. Ubeyisimenywa kule nhlangano esinamagatsha angu-15 KwaZulu-Natal.
UMsimang, okugcizelele ukuthi useyilungu le-ANC, wezwakalisa ukunganeliseki ngobuholi beqembu nohulumeni jikelele.
Uveze ukuthi iNingizimu Afrika ibhekene nenhlekelele enkulu kusukela yathola inkululeko nentando yabantu ngo1994.
“Sibhekene nesikhathi esinzima kakhulu, lena yinhlekelele ethinta izwe lonke. Lokhu kudalwa wuqhekeko kwi-ANC. Yize i-ANC kukhona okuhle ekwenzile, inkohlakalo iyakugqiba konke lokhu. Iyakhishwa imali yokubhekana nokuthuthukisa ezempilo nemfundo kodwa inkohlakalo nokungathembeki kumoshile,” kusho uMsimang.
Uthe inkinga enkulu izwe elibhekene nayo wukuthi akukho ukulingana.
Uveze ukuthi kusenegebe phakathi kwabampofu nabadla izambane likapondo.
UMsimang ugxeke uMengameli Jacob Zuma ngokwenzela phansi i-ANC wagxeka nobuholi bakhe athe abunandaba nabantu.
“UMengameli ucabanga ukuthi izimfuno zakhe zibaluleke ukwedlula ezeqembu. Usaqhubeka nokuhlaza i-ANC njengoba kwenzeka nangokwakhiwa komuzi wakhe eNkandla. Abanye bethu bazama ukuhlangana naye emuva kokuphuma kombiko wowayenguMvikeli woMphakathi (Advocate Thuli Madonsela) ngo-2014 kodwa kwangenzeka,” kusho uMsimang.
Yize engaphumelanga obala ngokuthi kumele yini umengameli asuke esikhundleni, uthe ukushenxa kwakhe kunganciphisa umsebenzi eqenjini.
Uphawule nangempikiswano yokuthi kumele yini amalungu ePhalamende e-ANC avote ngokuyimfihlo ukuchitha uZuma, wathi kuyihlazo ukuthi kukhona abangafuni kwenzeke.
Ukugxekile nokusatshiswa kwelungu lePhalamende uDkt Makhosi Khoza osephumele obala ngokuthi ufuna kuvotwe ngokuyimfihlo