Ngabazali okumele balawule okubukwa yizingane zabo
NGESONTO eledlule kuqubuke umsindo kukhalwa ngeziqephu ezigcwele ukuya kwabantu ocansini ngokwedlulele kwiGenerations: The Legacy.
Ngale nje kweziqephu ezigcwele ukuya ocansini, abantu bebebasola ababhali bomdlalo ngokuthi umlingisi othinteka kakhulu eziqeshini ubonakala eshintshanisa abesifazane. Ulala nabantu besifazane ababili alokhu eshintshana ngabo.
Bathi lokhu kugqugquzela ukuthi abantu bangathembeki ngendlela umdlalo okuveza ngayo sengathi kuyinto enhle. Umlingisi okukhalwa ngaye ubonakala engaconsi phansi ezintokazini ezimbili ezingezwa mshini ngaye.
Abalo mdlalo bazithethelele ngokuthi baye baxwayisa ukuthi isiqephu esizovezwa sifanelwe wukubukwa ngabantu abaneminyaka emingaki.
Nokho i-SABC izizwile izikhalo zabantu njengoba ngoMgqibelo zingaphindanga iziqephu zesonto zeGenerations: The Legacy zeviki eliphelile njengenhlalayenza kunalokho kudlalwe ezakudala.
Abazigxekayo iziqephu bazigxeka kufanele ngoba kuyaziwa ukuthi izinto ezibonakala kuthelevishini zinamandla kangakanani ikakhulukazi emqondweni wentsha.
Yize kunjalo kodwa kufanele abazali bakhumbule ukuthi kungumsebenzi wabo ukufundisa izingane zabo izinto okufanele zizazi ngezinto ezithinta impilo.
Okunye kungumsebenzi wabo ukuqapha nokulawula ukuthi izingane zibuka ini kuthelevishini ngokuthi bashaye umthetho ngezinto ezibukwayo noma ezingabukwa emakhaya abo, akusiwo umsebenzi wabantu ababhala imidlalo yethelevishini.
Njengoba abanye ababegxeka nje babekhala ngokuthi abasakwazi ukuyibuka nezingane i-Generations, kuyamangaza ukuthi babeqale kanjani ukuyibuka nezingane ngoba ayikaze ikufanele ukubukwa nezingane.
Yebo nayo i-SABC kufanele iqikelele izinto ezikhombisayo njengenhlangano esakazela umphakathi kodwa kufanele uphele umkhuba wabantu abafuna ukuhlale besola abanye abantu nohulumeni ngokungafundiseki kwezingane zabo.
Umthetho kwakho kufanele ushaywe nguwena futhi kufanele uzikhulisele izingane zakho, uzifundise izinto okufanele zizazi ungayekeleli kwithelevishini nothisha.